От ыйын 2 күнүгэр үс да үс баскетбол көрүҥэр бары спортсменнарга, тренердарга, көрөөччүлэргэ да күүтүүлээх уонна кэтэһиилээх финал күнэ үүннэ. Биллэн турар, бу күҥҥэ диэри күүстээхтэн күүстээх, түргэнтэн түргэн хамаандалар тиийэллэр. Баскетболист түргэн толкуйдаах, эрчимнээх, сымса, тулуурдаах уонна быһый буолуохтаах.
Бүгүҥҥү күҥҥэ көрөөччүлэр харахтарыгар бэйэлэрин кыахтаах өттүттэн көрдөрбүт хамаандаларынан Узбекистан, Казахстан, Саха, Таиланд уонна Беларусь буолаллар. Баскетбол спортивнай оонньуу быһыытынан элбэх техническай приемнарынан, түргэн уонна албастаах хамсаныыларынан дьон интэриэһин тардар.
Кыргыттарга 3 миэстэ иһин Казахстан уонна Саха Өрөспүүбүлүкэлэрин сүүмэрдэммит хамаандалара киирсэн, хомойуох иһин, саха кыргыттара кыайтаран, казах хамаандата 12:6 счетунан миэстэни ылла. Маҥнайгы миэстэни биир да хотторуута суох Беларусь хамаандата уонна Ураллааҕы Федеральнай уокурук былдьастылар. Биэс очкуонан баһыйан Беларусь кыраһыабай кыргыттара 14:9 ахсаанынан кыайыыны суруннулар. Урал уокуруга — 2 миэстэ.
Уолаттарга бочуоттаах 3 миэстэни 19:16 ахсаанынан Ураллааҕы Федеральнай уокурук ылла. Ыраахтан кэлбит Таиланд спортсменнара бэл кыранан хотторуу хомолтотун билэн 4 миэстэ буоллулар. Узбекистан уонна Беларусь киирсиилэригэр Узбекистан уолаттара баһыйан иһэн, 11:5 кыайтаран 2 миэстэ буоллулар.
Беларусь сүүмэрдэммит хамаандатын спортсмена Ярослав Гесть санаатын үллэстэр:
— Бэйэм Минскайдааҕы Олимпийскай резервэ училищетыгар үөрэнэбин, күҥҥэ иккитэ дьарыктанабын, биһигиттэн ордук спорт өттүнэн ситиһиилэри ирдииллэр. Классическай баскетболу 3х3-тээҕэр ордоробун. Баскетбол көрүҥүнэн дьарыктамматым буоллар пловец эбэтэр футболист буолуом этэ дии саныыбын. Спортка кумира суохпун эрээри, бэйэм уһулуччу үчүгэй буолуохпун баҕарабын. Инникитин профессиональнай оонньооччу буолан Единай лигаҕа ВТБ-га оонньуур баҕа санаалаахпын, сатамматаҕына сөбүлүүр дьарыкпын быраҕыам суоҕа. «Азия оҕолоро» ооонньууларга кэлэн улахан уопут ылбыппытыттан үөрэн турабын. Саха сиригэр маҥнайгыбытын кэллибит, барытын сөбүлээтибит, сахалар олус ыалдьытымсах эбиттэр.
Биэс күн түмүгүнэн тыҥааһыннаах киирсиилэри көрдөрөн, Беларусь өрөспүүбүлүкэтин спортсменнара күрэхтэһии саамай күүстээх оонньооччулара буоллулар. Кинилэргэ эҕэрдэ!
Ити курдук VIII «Азия оҕолоро» норуоттар икки ардыларынааҕы спортивнай оонньууларын үс да үс баскетбола үөрүүлээхтик түмүктэннэ. Баскетболистарга аныгыс көрсүөххэ диэри!
Анжелина Жданова, оҕо пресс-киинин эдкора.
Ааптар хаартыскалара.
keskil14.ru