Олунньу 17 күнүгэр М.Н. Готовцев аатынан Танда орто оскуолатын үөрэнээччилэригэр умнуллубат күн буолан ааста.
Бу күн биһиги киэн туттар Геройбут Владимир Деонисович Лонгинов олоро сылдьыбыт музей-дьиэтин көрдүбүт.
Аҕа дойду Улуу сэриитин Геройа Владимир Деонисович Лонгинов оҕо сылдьан, 1926-1928 сс. Бээрийэҕэ олоро сылдьыбыта. Ол дьиэтэ билигин музей буолан турар.
Биһиги онно сылдьан, Владимир Деонисович Лонгиновы кытта алтыһан, кини оҕо сааһын эйгэтигэр киирэн ааспыт курдук сананныбыт. Музейга аҕабыыт маллара, церковнай староста ороно, Герой Хабырылла Дьөгүөрэп аҕалбыт сиэркилэтэ, таҥара дьиэтиттэн хаалбыт кинигэлэр курдук ааспыт олох историятын көрдөрөр олус сыаннай экспонаттары көрдүбүт.
Ону таһынан Бээрийэ оскуолатын, музейын, кулуупка Кыайыы 80 сылыгар аналлаах быыстапканы, Тандаҕа учууталынан үлэлии сылдьыбыт Петр Антонович Копырин аатынан оҕолор бэйэлэрэ оҥорбут музейдарын сэргээн көрдүбүт.
Бу күн биһиги Танда түөрт Геройдарын туһунан кэпсиир ТОК оонньууну ыыттыбыт. Бээрийэ оҕолорун кытта билсиһэн, араас оонньуулары оонньоотубут. Оҕо бөҕөнү кытта билсэн, кэпсэтэн, чэйдээн олус үчүгэйдик сырыттыбыт.
Маннык тэрээһиннэр өссө да буола туралларыгар баҕарабын. Бээрийэ олохтоохторугар истиҥник көрсүбүккүтүгэр барҕа махталбытын тиэрдэбит.
Валерия ГОТОВЦЕВА, Х кылаас,
М.Н. Готовцев аатынан Танда орто оскуолата, Уус Алдан
Снежанна Готовцева хаартыскалара