Билигин, хаһыаттарга сурутуу уустугурбут кэмигэр, Мэҥэ Хаҥалас улууһун Н.Д. Неустроев аатынан Бэдьимэ орто оскуолата сурутууга былааннаах үлэни ыытар. Быйыл бу оскуола 5 кылаастара сылы быһа 100% «Кэскилгэ» суруйтардылар! Бу туһунан Лера Сергеева суруйар.
Быйыл «Кэскилбит» 85 сылын көрсө хаһыаппытыгар сылы быһа кылааһынан 100% сурутар сыаллаах былааммытын толордубут!
Сыл 1 аҥаарыгар даҕаны, билигин даҕаны сурутуу 100% буолла! Онно төрөппүттэргэ, эбээлэргэ, учууталбытыгар Варвара Петровнаҕа махталбытын тиэрдэбит.
Биһиги кылааспытыгар сэттиэбит: 4 кыыс, 3 уол. Кылааһынан үҥкүүнэн дьарыктанабыт, соторутааҕыта улуус куонкуруһугар дипломант буолбуппут. Былырыын Москваҕа үҥкүүлүү барыахтаах этибит да, пандемия буолан барбатахпыт. Онтон наһаа хомойбуппут. Үҥкүүгэ Аргунова Гликорья Матвеевна үөрэтэр.
Уолаттарбыт техническэй куруһуокка сылдьан эмиэ ситиһиилээхтэр. Кинилэр Советскай Союз Геройа Федор Кузьмич Попов 100 сылыгар анаан уота хамсыыр «вечнай огонь» макетын оҥорбуттара. Салайааччылара — Игорь Афанасьевич Плотников. Кыргыттар волейболга, муода студиятыгар дьарыктанан эмиэ үрдүк ситиһиилээхпит. «Күн чөмчүүк» муода куонкуруһугар кыайыылаах буолбуппут.
Кылааһынан үөрэхпитигэр кыһаллабыт, иллээхпит, элбэх дьарыктаахпыт, уруһуйдуубут, хабылыктыыбыт-хаамыскалыыбыт. Уонна биһиги чыычаахтары аһатар үтүө үгэстээхпит!