Бүгүн «Кружало» атыы-эргиэн киинигэр «Бэчээт тиэргэнэ-2022» быыстапка-дьаарбаҥка иккис күнэ ааста. «Айар» кинигэ бэчээтин, «Кэскил» оҕо бэчээтин кыһалара, «Сахамедиа», «Сахапечать» хампаанньалар, «Көмүөл» бэчээт дьиэтэ, «Илин» сурунаал, Ю. А. Гагарин аатынан типография, СӨ суруйааччылар сойуустара уо.д.а үчүгэйкээн таһаарыыларын, кинигэлэрин, сурунаалларын атыыга таһаарбыттар.
Саха сирин суруйааччыларын сойууһун бэрэссэдээтэлэ, норуодунай бэйиэт Наталья Ивановна Харлампьева, «Чолбон» сурунаал кылаабынай эрэдээктэрэ, суруйааччы Гаврил Андросов, «Далбар Хотун» сурунаал эрэдээктэрэ, бэйиэт Зинаида Архипова салайыылаах, норуодунай суруйааччы Баһылай Харысхал кинигэлэрэ, «Якутский век», «Татаар аныгы прозатын антологията» кинигэлэр сүрэхтэннилэр.
Москваттан кэлбит, «Молодая гвардия» кинигэ кыһатын салайааччыта, биллиилээх суруйааччы, суруналыыс, биограф Мария Кирилловна Залесская саха литературата уратытын туһунан тыл эттэ.
Биллиилээх нуучча оҕо суруйааччыта Анна Гончарова кинигэлэрин туһунан кэпсээтэ, сэргэх оонньууну ыытта.
«Бэчээт тиэргэнин» саамай кыра ыалдьыта, 1 саастаах Кырсаада Кирсанова кинигэни олус сэргиир эбит. Аҕатын кытта көтөхсүбүтүнэн сылдьан кинигэ арааһын сэргии көрдө. Ытыс саҕа кинигэни быыкаа илиитинэн тутан турарын көрүҥ.
Үөрүүлээх сонун: Н. Е. Мординов — Амма Аччыгыйа аатынан «Кэскил» оҕо кыһабыт «Юность Севера. Arctic ideas” научнай сурунаала «Периодическое издание» анал аат иһинэн 3 бочуоттаах миэстэни ылла!
Эльдар Садовников