Уус Алдан Г.В. Егоров аатынан Мүрүтээҕи 1 нүөмэрдээх оскуолаҕа биһиги 2018 сыллаахха бастакы кылааска киирбиппит. Маҥнайгы учууталбыт Пермякова Евдокия Олеговна этэ. Оҕо элбэх буолан, «а», «б», «в», «г» кылаастарга араарбыттара, биһиги кылааска 24 этибит. Учууталбыт Евдокия Олеговна ирдэбиллээх, кыһамньылаах өйдөнүмтүө гына үчүгэйдик үөрэтээччи. Кылаас таһыгар үлэҕэ, араас күрэхтэргэ, күлэн-үөрэн барыбытын бииргэ тэҥник илдьэ сылдьааччы. Оттон уруок саҕаланна да уу-чуумпу буолааччы, ким да мэниктээбэт этэ.
5 кылаас – оскуолаҕа орто сүһүөхтэр кылаастарыгар киирсэр, олох атын үөрэтии буолар эбит. Кылааспыт салайааччыта, биология учуутала Федора Дмитриевна буолбута. Кини биолог буолан кылааспытыгар аквариумнаахпыт, араас элбэх сибэккилээхпит, олору барытын кэтээн көрөбүт, үөрэтэбит. Араас саҥа интэриэһинэй предметтэр бааллар, холобур: география, биология, история. Алын кылааска холоотоххо, предмет аайы атын учууталлар үөрэтэллэр. Уруок бүппүтүн билбэккэ да хаалабыт, хас биирдии учуутал уруогун ыытара уратылаах, олус интэриэһинэй, ардыгар күлүүлээх да түгэннэри холобур гынан кэпсииллэр.
Барыта саҥа, интэриэһинэй буолан, үөрэнэргэ олус үчүгэй. Бэһис кылааска араас тэрээһиннэр, куонкурустар буолаллар эбит, биһиги онно барытыгар көхтөөхтүк кыттабыт, барытын билэ-көрө сатыыбыт.
Бэһис кылааска тахсаммыт биһиги быдан улааппыппыт уонна эппиэтинэстээх буолбуппут олус үөрдэр. Биһиги бары үөрэхпитигэр кыһаллыахпыт, эппиэтинэстээхтик сыһыаннаһыахпыт диэн саныыбын. Бастакы учууталбыт Евдокия Олеговна биэрбит билиитэ күүс-көмө буолуо диэн эрэнэбит.
Наташа Стручкова, эдкор,
Мүрү 1 нүөмэрдээх орто оскуолата,
Уус Алдан.