Дьиэ кэргэн сылын түмүктүүр «Семья — отражение жизни» тэрээһин үрдүк таһымҥа буолан ааста. Бу тэрээһиҥҥэ сыл бастыҥнарын, республиканскай күрэхтэр түмүктэринэн чиэстээһин буолла. Лөгөй лиссиэй-интэринээтиттэн Любовь Петухова Медиа куруһуок салайыытынан 10-с «А» кылаас үөрэнээччитэ Анжелика Игнатьева уонна 3-с кылаас үөрэнээччитэ Эрсан Кычкин «Бастыҥ оҕо кэрэспэндьиэннэр» диэн хайысхаҕа кыайыылаах буоллулар. Онон Анжеликаны, Эрсаны уонна кинилэр салайааччыларын үрдүк ситиһиилэринэн эҕэрдэлиибит! Салҕыы маннык үрдүк ситиһиилэр кэлэ турдуннар диэн баҕарабыт.
Бу күрэх кыайыылааҕын Эрсаны кытары кэпсэттим.
Биһиги «Тыа сиригэр олорорбун олус таптыыбын» диэн ыстатыйа уонна видеоролик оҥорбуппут. Мин дьиэ кэргэним туһунан толору билиһиннэрбитим. Тыа сиригэр олорорбутун тоҕо сөбүлүүрбүтүн кэпсээбитим. Биһиги дьиэ кэргэн элбэх сылгы, сүөһү иитэбит, сайынын бары бииргэ оттуубут. Мин сайын эбээлээх эһээлэрбэр сайылыкка көмөлөһөбүн. Биһиги улахан ситиһиибитигэр күүс көмө буолбут дьоннорбор ол курдук ийэбэр, аҕабар, убайбар, салайааччыбар Любовь Евгениевнаҕа уонна Анжеликаҕа махтанабын. Уонна салҕыы маннык курэхтэр буола турдуннар диэн баҕарабын.
Суруйда Янис СЫСОЛЯТИН «SiTiM LegMedia» юнкора