Новосибирскай куораттан эҕэрдэ буолуохтун! Толмачево аэропордугар олорон суруйабын. Хотугулуу Илиҥҥи федеральнай университет 75 бастыҥ устудьуона Москва куоракка нэдиэлэ устата күүлэйдээн, кэрэ-бэлиэ сирдэрин кэрийэн, билии бөҕөтүн эбинэн иһэбит. «Рождественские каникулы» диэн тохсус сылын үлэлиир биһирэм программа чэрчитинэн.
Бу путевканан наукаҕа, общественнай үлэҕэ, спорка, айар эйгэҕэ ситиһиилээх устудьуоннар наҕараадаланаллар.
Сорохтор (эмиэ 75 киһи) Санкт-Петербурга сынньаннылар.
Москваҕа дьаарбайбыттар Третьяков галерея коллекциятын, Оружейнай палата экспонаттарын, Кремль музейдарын, планетарийы, «Microsoft» хампаанньа офиһын, МГУ-ну, Мюзикл театрыгар «Пассажиры» цирк-испэктээги, «Мосфильм» устар устуудьуйаларын кэрэхсии көрдүбүт. Саҥа дьыллыы киэркэйбит Москва олус кыраһыай, тырымнас уоттарынан сандаара олорор.
Онон, оҕолоор, үөрэххэ киирдэххитинэ, кыһанан үөрэнээриҥ, көхтөөх буолаарыҥ. Оччоҕо стипендияҕыт да улахан буолуо, маннык бириэмийэҕэ да тиксиэххит.
Дайаана Пермякова, ИМИ II курсун устудьуона.