Олунньу 20 күнүгэр Дьокуускайдааҕы Н.И.Шарин аатынан 39-с нүөмэрдээх орто оскуолаҕа Аҕа дойдуну көмүскээччилэрин күнүгэр аналлаах «БАСТЫҤ УОЛАН» диэн саха төрүт оонньууларыгар күрэхтэһии буолан ааста. Бу күрэх биһиги оскуолабытыгар иккис төгүлүн ыытыллар.
Күрэх сыала — үүнэр көлүөнэҕэ национальнай спорт көрүҥнэрин тарҕатыы, эт-хаан өттүнэн чөл туругу хаччыйыы уонна төрөөбүт дойдуга бэриниилээх буолууну иитии. Оҕолор бары дьарыкка киирэннэр, саалаҕа суруйтаран күһүҥҥэттэн бэлэмнэннилэр, бу күнү долгуйа күүттүлэр.
Күрэх уопсайа 7 түһүмэхтээх ааста: 1. Бэйэни билиһиннэрии. 2. Үс төгүл үс (кылыы,ыстаҥа, куобах) 3. Тутум эргиир 4. Мас тардыһыы 5. Түргэн наарта 6. Хапсаҕай 7. Кууллаах сүүрүү (30кг кумахтаах куул).
Күрэх дьүүллүүр сүбэтигэр Ньургун Петухов — мас тардыһыытыгар спорт маастара, 2014 сыллаах Дыгын оонньууларын кыттыылааҕа, мас тардыһыыга республика турнирдарын хас да төгүллээх чемпиона, Лена Винокурова — физкультура учуутала, Алексей Алексеев — физкультуура учуутала, СӨ атах оонньуутугар спорт маастара үлэлээтилэр. Күрэх хаамыытын СӨ Хотугу многоборьеҕа спорт маастара Темир Сыдыкбеков сырдатта. Саха сирин народнай артыыһа Аскалон Павлов, Умсуура, Кэскил Баишев күндү ыалдьыт буолан тэтимнээх ырыаларын бэлэх ууннулар.
Күрэххэ 12 уол кыттыыны ылла: Уваров Леонид, 8 «а» кылаас, Клементьев Денис, 8 «б» кылаас, Нифонов Иван, 8 «в» кылаас, Григорьев Никита, 8 «г» кылаас, Филимонов Альберт, 8 «д» кылаас, Васильев Петя, 9 «а» кылаас, Антонов Петя, 9 «б» кылаас, Гоголев Тимур, 9 «в» кылаас, Захаров Айсен, 10 «а» кылаас, Слепцов Эдгар, 10 «а» кылаас, Николаев Тимофей, 10 «б» кылаас, Бурцев Сулустан, 11 кылаас.
Үс төгүл үс түһүмэххэ саамай уһуну ыстанан кыайыы өрөгөйүн – Николаев Тимофей ылла. Саамай элбэх тутум эргиири 39-та Антонов Петя оҥордо. Хапсаҕай халбас харатыгар 1 миэстэни Николаев Тимофей ылла. Кууллаах сүүрүүгэ саамай түргэнник Бурцев Сулустан сүүрдэ. Тыҥааһыннаах, чаҕылхай күрэхтэһии түмүгэр уопсай түмүккэ барыларын ырааҕынан кыайан бастакы бириистээх миэстэҕэ 10 «б» кылаас үөрэнээччитэ Николаев Тимофей тигистэ.
«Бастыҥ Уолан» күрэххэ кыттыбыт уолаттарга, бэлэмнээбит уһуйааччыларыгар барҕа махталбытын тиэрдэбит. Үгэскэ киирбит өбүгэбит оонньуутун күннээҕи олоххутугар киллэрэн, эккитин-хааҥҥытын сайыннара, дьарыктыы сылдьыҥ диэн баҕа санаабытын этэбит!
Мария Алексеева, IX «В» кылаас,
Н.И. Шарин аатынан 39-с №-дээх орто оскуола,
Дьокуускай