От ыйын 8-10 күннэригэр Мэҥэ Хаҥалас улууһун Майа нэһилиэгин Ураһалаах сиригэр-уотугар «Сельская школа&Образовательная марка» диэн өрөспүүбүлүкэтээҕи XX педагогическай дьаарбаҥка ыытылла турар.
Өрөспүүбүлүкэ оскуолалара, уһуйааннара, төрөппүт кэмитиэттэрэ бастыҥ үлэлэрин көмүскүүллэр, дьоҥҥо-сэргэҕэ кэпсииллэр, уопут атастаһаллар.
Тэрээһин чэрчитинэн, бырайыактары көмүскээһин, төгүрүк остуоллар, маастар-кылаастар, кэпсэтиһэр түһүлгэлэр, творческай лабораториялар үлэлиэхтэрэ, идэ таһымын үрдэтэр куурустар ыытыллыахтара.
Анна Михайлова, тэрийээччи, Мэҥэ Хаҥалас улууһун Үөрэҕирии саламтатын иитэр үлэҕэ салаатын сүрүн исписэлииһэ:
-XX төгүлүн ыытыллар педагогическай дьаарбаҥкаҕа оҕону иитиигэ-үөрэтиигэ бастыҥ үлэлээх, сонун бырайыактаах өрөспүүбүлүкэбит бары улуустарыттан оскуолалар, уһуйааннар кытталлар. Бүгүн күнүс 3 чаас туругунан 1980 киһи регистрацияланна. Кыттааччылар, ыалдьыттар кэлэ тураллар. Барыта 3000 киһини кэтэһэбит. Хайыы-үйэ түһүлгэлэргэ секцияларынан арахсан, үлэ бара турар. Дьаарбаҥка үөрүүлээх аһыллыыта сарсын 11 ч. буолуо. 3 күн устата учууталлар, иитээччилэр, төрөппүттэр оҕону, ыччаты иитиигэ ыллыктаах санааларын, сонун хайысхалары кэпсэтиһиэхтэрэ, үлэ хайысхатын торумнуохтара. Үлэни, сынньалаҥы тэҥҥэ дьүөрэлиир сыаллаах күндү ыалдьыттарбытыгар анаан быыстапкалар, маастар-кылаастар үлэлиэхтэрэ, куонкурустар, күрэхтэр ыытыллыахтара, кэнсиэртэр тэриллиэхтэрэ.
Мария Иванова
keskil14.ru