Олунньу 9-11 күннэригэр дойдубут киинэ Москва уобалаһын Солнечногорск куоратын «Сенеж» дьаһалта мастарыскыайыгар «Движение первых» Россиятааҕы оҕо уонна ыччат хамсааһынын актыбыыстарын көрсүһүүлэрэ буолан ааста.
Биһиги өрөспүүбүлүкэбититтэн үс оҕо тэрилтэтин лидердэрэ, кинилэр ортолоругар мин — Таатта улууһуттан улуустааҕы «Үрдэл» биир сомоҕо оҕо хамсааһынын лидера, «Сатабыл» оҕо айымньытын дьиэтин «Ситик» оҕо тэрилтэтин лидера Снежана Заворотная кыттан кэллим. Биһигини Саха Өрөспүүбүлүкэтин оҕолорун уопсастыбаннай холбоһуктарын сойууһун бэрэссэдээтэлэ Геннадий Охлопков салайан илдьэ сырытта.
«Сенеж» управление мастарыскыайыгар Россия оҕолорун уопсастыбаннай холбоһуктарын лиидэрдэрэ уонна актыбыыстара мустубуттар. Российское движение детей и молодёжи (РДДМ) диэн улахан хамсааһын быйыл саҥа олоххо киирэрин туһунан дойдубут салайааччыта В.В. Путин этэн турар. Саҥа тэриллэр холбоһук оскуола үөрэнээччилэрин эрэ буолбакка, устудьуон оҕолору эмиэ хабан үлэтин ыытыахтаах. Бу мастарыскыай үлэтигэр уопсайа 95 актыбыыс кыттыыны ылан үлэлээтибит.
Мин бэйэбэр оҕо хамсааһынын туһунан олус элбэх саҥаны биллим, холобура, хамсааһын сыалын-соругун, ис хоһоонун. Ол курдук, үлэҕэ хайдах тоҕоостоох ыйытыыны туруорарга, түргэнник онно эппиэт булан биэрэргэ, түргэнник хамсанарга, толкуйдуурга үөрэнним. «Бастыҥнар хамсааһыннара» туһунан өссө үчүгэйдик билэн, ыытар тэрээһиннэригэр кыттан, өссө элбэх оҕо саҥа бырайыак ис хоһоонун билэллэрин туһугар үлэни ыытарга бэлэмнэннибит.
Маннык улахан тэрээһиҥҥэ бастакыбын сырыттым. Олус астынным, сөбүлээтим. Атын оҕолортон, билбэккиттэн кыбыстар, толлор наадата суоҕун өйдөөтүм уонна билбэт буоллаххына, ыйыталаһан, билэн, көрөн иһэр наадалааҕын туһунан этиэм этэ. Уонна оҕолорго сүбэлиэм этэ, бу курдук биир санаанан үлэлээтэххэ эрэ, бэйэҕэр үчүгэй буолар уонна куттаммакка, иннин диэки баран иһэргэ кыахтанаҕын.
Актыыбынайдык, сэргэхтик үлэлээн, сыалбытын ситиһэргэ кыһаныаҕыҥ диэн оҕолору ыҥырабын!
Снежана Заворотная,
«Сатабыл» медиа-студията Тааттатааҕы «Сатабыл» оҕо айымньытын дьиэтэ.