Мэҥэ-Хаҥалас улууһун Н.Д. Неустроев аатынан Бэдьимэ орто оскуолатыгар үлэни өрө тутарга иитэр бырайыак сэттис сылын ыытыллар.
5-11 кылаастар биирдии үлэһит оҕону талаллар, тоҕо талбыттарын быһааран реклама оҥорон, дьон иннигэр оҕо үлэһит хаачыстыбаларын сырдаталлар. Кыайыылаах оҕолорго «Бастыҥ үлэһит оҕо» анал бэлиэ үөрүүлээх быһыыга туттарыллар. Бэлиэни «Мастан уһаныы» куруһуок оҕолоро оҥороллор. Бу бэлиэ Эйэ, Үлэ, Маай бырааһынньыгар ананар.
Быйылгы бэлиэни ылар чиэскэ бастыҥ үлэһит оҕолор тигистилэр: Виталий Неустроев (5 кыл.), Эвелина Сидорова (6 кыл.), Никита Чемезов (7 кыл.), Арсен Плотников (8 кыл.), Арина Семёнова (9 кыл.), Диана Сергучёва (10 кыл.), Крисьян Ходулов (11 кыл.).
Бу оҕолор дьиэ ис-тас үлэтигэр көмөлөрө элбэх, бырааттарын-балтыларын көрөллөр, кэтэх хаһаайыстыба үлэтигэр эмиэ туора турбаттар, ньирэй аһаталлар, сылгыларын уулаталлар, хотон көрсөллөр, сайынын оттууллар, оҕуруокка уу куталлар, үүт туттараллар…
Уонна сүрүн үлэлэригэр — үөрэхтэригэр кыһаллаллар!
keskil14.ru