Сэтинньи 23 күнүгэр Амма улууһугар “WorldSkills-2022” күрэҕэ буолан ааста. Биһиги оскуолабыт хамаандатын география уонна ОБЖ учуутала Борис Сергеевич Яковлев бэлэмнээбитэ.
Салайааччы кыттыыларын туһунан маннык кэпсээтэ: «Быыһыыр үлэ» диэн компетенцияҕа 3 хамаанда күөн көрүстэ. Төһө да аҕыйах хамаанда буоллар, күрэх тыҥааһыннаахтык ааста. Кыттааччылар билиилэрин, сатабылларын көрдөрдүлэр. Ол курдук, баһаарынай таҥаһын бириэмэҕэ кэтиигэ, суһал көмөнү оҥорууга, саахалга түбэспит киһини быыһыырга, быанан араас узеллары баайыыга, үөһэ ыттыыга (скалолазание) күрэхтэстилэр. Түмүккэ 3 миэстэ — Бөтүҥ, 2 миэстэ — Абаҕа уонна кыайыылааҕынан Эмис хамаандата таҕыста».
Хамаанда кыттыылааҕа 10 кылаас үөрэнээччитэ Петя Платонов: «Күрэхтэһиибит «Дружба» диэн спортсаалаҕа буолла. Хамандыырбыт — Мичил Петров. Бастакы түһүмэх БОП диэн, ол аата «боевая одежда пожарного», ону бириэмэҕэ кэтэҕин. Ол кэннэ скалодром, эстафета, лабиринт диэн көрүҥнэр буолбуттара. Мин өйдөөн хаалбытым «Вертолет» диэн, онно мин икки хос баайыы оҥорбутум (двойная спасательная петля).
Биһиги бу күрэххэ хаһыс да кыттыыбыт буолар. Былырыын биһиги Мичиллиин улуус хамаандатыгар киирэн, өрөспүүбүлүкэҕэ бастаабыппыт.
«Кэскил» медиакиин, Эмис орто оскуолата, Амма улууһа.