2004 сыллаахха Саха сиригэр III норуоттар икки ардыларынааҕы «Азия оҕолоро» спортивнай оонньуу Дьокуускай куоракка буолан ааспыта. Бу улахан күрэхтэһиигэ 11 дойдуттан 1509 спортсмен кыттыбытын билэбит. Ол курдук Армения, Вьетнам, Индия, Индонезия, Казахстан, Кытай, КНДР, Кыргызстан, Монголия, Таиланд, Турция уонна Арассыыйа 26 регионуттан элбэх оҕо кэлбитэ.
Оонньууларга 270 комплект мэтээли 17 араас спорт көрүҥүн бастыҥнарыгар туттарбыттара: баскетбол, бокс, көҥүл тустуу, волейбол, дзюдо, чэпчэки атлетика, мас-рестлинг, дуобат, остуол тенниһэ, пауэрлифтинг, спортивнай гимнастика, спортивнай үҥкүү, тхэквондо, футбол, художественнай гимнастика, саахымат, саха национальнай ыстаныылара курдук көрүҥнэри Саха сирэ эрэ буолбакка, аан дойду бары муннуктарыгар долгуйа көрбүттэрэ.
Ити сылга биһиги нэһилиэкпититтэн, Хаҥалас улууһун Улахан Ааныттан, боксаҕа Семён Степанов кыттыыны ылбыта. Кини от ыйын 26 күнүгэр Дьокуускай куоракка оҕо дыбарыаһыгар 46 кг бастакы киирсиитигэр маҥнайгы кыайыыта кэлэр.
Бу күн оҕо дыбарыаһыгар Арассыыйа биллиилээх спортсменнара бокса күрэҕин көрө кэлбиттэр. Ол курдук фигуристар Илья Авербух, Ирина Лобачёва, волейболга аан дойду чемпионката Татьяна Сарычева, чэпчэки атлетикаҕа 4 төгүллээх аан дойду рекордсмена Тамара Быкова, фехтованиеҕа олимпийскай чемпионка Галина Горохова уонна көҥүл тустууга олимпийскай чемпион Роман Дмитриев ыалдьыттаабыттар.
Боксаҕа Россия спордун маастара, биһиги биир дойдулаахпыт Семён Степанов III норуоттар икки ардыларынааҕы «Азия оҕолоро» спортивнай оонньууга чемпион аатын сүкпүтэ. Билигин да Улахан Ааммытыгар оҕолор боксанан утумнаахтык дьарыктаналлар. Семен маҥнайгы тренерэ Виктор Пудов элбэх иитиллээччилэрэ бокса күрэхтэһиилэригэр үрдүк көрдөрүүлээхтэр.
Хаҥалас улууһун
2-с Малдьаҕар орто оскуолатын медиакиинэ