Мин быйыл «Кэскил» оҕо бэчээтин кыһата тэрийэн ыыппыт «Төрүччү» лааҕырыгар сылдьан, төрдү-ууһу үөрэтии туһунан элбэҕи билэн кэлбитим. Биһиги олохпут төрүччүттэн ситимнэнэн салҕанан баран иһэр.
Балаҕан ыйын 1 күнүгэр оскуолабытыгар буолан ааспыт Билии күнүгэр төрүччүнү кытта ситимнээх олус үчүгэй түгэн буолан ааста. Ол туһунан эһиэхэ кэпсиэхпин баҕарабын.
Балаҕан ыйын 1 күнүгэр оскуоланы бүтэрэр туйгун үөрэнээччи уонна оскуолаҕа саҥа киирбит үөрэнээччилэртэн саамай бастыҥнара Бастакы чуорааны тыаһаталлар. Бу – Билии күнүн үтүө үгэһэ.
Быйыл бу үгэс биһиэхэ уратылаах буолла. Ол курдук нэһилиэкпит олохтоохторо Николай Павлович уонна Мария Александровна Кириллиннэр дьиэ кэргэттэрин улахан уоллара Дьулустаан 11-с кылаас, оттон кыра уоллара Павлик бастакы кылаас буоллулар. Онон көлүөнэлэр утумнаах буолууларын уонна саҥа үөрэх дьыла саҕаламмытын бэлиэтээн, Бастакы чуорааны убайдыы-быраат Дьулустаан, Павлик Кириллиннэр тыаһаттылар. Бэлиэтээн эппиттэрин курдук, выпускник уонна бастакы кылааска киирэр бииргэ төрөөбүттэр биир үөрэх дьылыгар сөп түбэспиттэрэ биһиги оскуолабытыгар аан бастакытын буолла. Ол иһин Билии күнүн ураты суолталаатылар уонна долгуттулар.
Дьулустаан оскуоланы бүтэрэр сыла буолан, маҥнайгы кылааска киирэр быраатыгар Павликка үөрэх, билии аартыгын устун айанныыр эстафетаны туттарда. Онон оскуола боруогун атыллаабыт кырачаан Павликка икки бүк долгутуулаах, икки бүк эппиэтинэстээх буолла.
Өссө төгүл бииргэ үөрэнэр доҕотторбун, учууталларбын саҥа үөрэх дьыла саҕаламмытынан эҕэрдэлиибин! Бу үөрэх дьыла барыбытыгар ситиһиилээх буоллун!
Айуол НОВИКОВ, VII кылаас, 2-с Чакыр, Амма