Муус устар 9-10 күннэригэр Дьокуускай куоракка 5-с төгүлүн ыытыллар өрөспүүбүлүкэтээҕи «Басхан -2025» дьыалабыай оонньуу күрэҕэ буолан ааста. Бу дьоһуннаах күрэххэ Н.И. Шарин аатынан 39 №-дээх орто оскуолатын 8 «Д» кылааһын үөрэнээччитэ Богдан Иванов оскуолабыт аатыттан бастакынан кыттан, суолу арыйда.
Богдан күрэх туһунан санаатын маннык үллэстэр:
Уол оҕо төрөөбүт дойдун туһунан, төрүт тылын, өбүгэлэрбит үтүө үгэстэрин, кимтэн сыдьааннаахпытын төһө билэрбитин сыаналыыр, олус интэриэһинэй күрэх буолан ааста.
Бастакы күн ыалдьыттары көрсүү кэннэ, оонньуу үөрүүлээх аһыллыыта буолбута. Күрэх «Удьуор утума» түһүмэхтэн саҕаламмыта. Кыттааччылар төрдүлэрин-уустарын төһө киэҥник билэллэрин сыаналааһын буолбута. Дьүүллүүр сүбэ иннигэр биирдии-биирдии тахсан, өбүгэлэрбит тустарынан билиһиннэрбиппит. Мин ийэм өттүнэн хос эһэм (ийэм аҕатын аҕата) төрдүн-ууһун кэпсиирдии ийэбинээн сүбэлэспиппит уонна бэлэмнэммиппит. Тоҕус көлүөнэ төрүттэрбин үөрэппиппиттэн киэҥ туттабын, хас биирдии киһи төрдүн-ууһуун билиэхтээх дии саныыбын. «Өркөн өй» диэн иккис түһүмэххэ биэс ыйытыыга бэриллибит бириэмэҕэ эппиэт хоруйдуурбут ирдэнэр, бириэмэ ыгым буолан, долгуйан хаалаамын, сыыһа-халты эппиэттээһин да баар этэ. Үһүс түһүмэҕинэн «Дойду салайааччылара мин харахпынан» диэн кыттааччы төһө дойду салайааччыларын билэрин, билиитин-көрүүтүн, кэпсиир дьоҕурун сыаналааһын. Мин 13 нүөмэри талбыппар, Гавриил Иосифович Чиряев туһунан тиэмэ түбэспитэ. Г.И. Чиряев быйыл үбүлүөйдээх сыла, кини олоҕун, биографиятын туһунан үөрэппитим.
Иккис күн төрдүс түһүмэх «Куолулааһын» дьыалабыай оонньууга «Тыа хаһаайыстыбатыгар ыччаты сыһыарыы, төрүт дьарыгы тутан хааларбыт сайдыыга тиэрдиэ дуо?» диэн тиэмэҕэ кыттааччылар тус санааларын этиниэхтээхтэр диэн ирдэбиллээх. Уол оҕо инникитин дойдутугар тыа хаһаайыстыбата сайдарын туһугар туох санаалааҕын сатаан этинэр, туруорсар, куолулуур дьоҕурдааҕын сыаналыыр күрэх көрүҥэ. Мин тус бэйэм олохпуттан холобурдаан, тыа сиригэр улааппыт буоламмын, тыа хаһаайыстыбатыгар кэлэр көлүөнэни, эдэр ыччаты сыһыарарга элбэх үлэ барыан наада, сайыҥҥы лааҕырдарга оҕолорго сөптөөх тыа хаһаайыстыбатыгар сыһыаннаах үлэлэри былаанныахха диэн санаабын эппитим. Аһыыр аспыт барыта сибиэһэй, эппит, үүппүт бэйэбит бородууксуйабыт киэнэ буолуохтаах диэн баҕа санаабын тоһоҕолоон биэрбитим.
Бэһис түһүмэххэ «Айыы умсулҕана» бэриллибит устуруокалары ситэрэн бэриллибит бириэмэҕэ тутатына хоһоон айааһына. Мин дойдубар сыһыаннаах хоһоон айарга санаммытым, тыл тылга бэйэтэ сааһыланан хоһоонум табыллан тахсыбыта.
Биэс түһүмэх кэнниттэн «Саха омук эрэлэ — уол оҕо» диэн төгүрүк остуолга аһаҕас кэпсэтии буолбута, бары кыттааччылар тус санааларын эппиттэрэ. «Басхан — 2025» күрэх түмүгэ тахсыбыта, наҕараадалааһын, уопсай хаартыскага түһүү буолбута.
Мин «Кэскиллээх санаа басхана» диэн номинацияҕа тиксэммин, олуһун үөрдүм. Олус интэриэһинэй дириҥ ис суолталаах күрэх эбит дии санаатым, элбэҕи биллим-көрдүм, уопут ыллым, олоххо көрүүм, интэриэһим уларыйда. Бииргэ курэхтэспит уолаттарым олус дьоҕурдаах, киэҥ билиилээх, талааннаах эбиттэр, кинилэртэн элбэххэ үөрэнним диэххэ сөп. Барыларыгар ситиһиини, кыайыыны-хотууну, кэрэ-бэлиэ, умнуллубат түгэннэри баҕарабын. Иилээн-саҕалаан биэрбит учууталбар Изольда Ивановнаҕа барҕа махталбын тиэрдэбин. Инникитин да үүнэр ыччаты үтүөҕэ –сырдыкка угуйар суолталаах күрэхтэр киэҥ далааһынннахтык тэриллэ турдунар.
Богдаҥҥа үөрэҕэр, спорка өссө үрдүк ситиһиилэри, төрөөбүт дойдубутун сайыннарар дьоһуннаах киһи буоларыгар баҕарабыт!
Барахсанова Дайаана, Халыева Аэлина,
7 «Г» кылаас үөрэнээччилэрэ, Н.И. Шарин аатынан 39 №-дээх орто оскуолата