Норуоттар икки ардыларынааҕы «Азия оҕолоро» спортивнай оонньуулартан университетскай успуорка» научнай кэмпириэнсийэ иһинэн успуорт уонна мэдиссиинэ быыстапката ыытылынна.
Манна араас хабааннаах успуорка туттуллар мал, чөл олоҕу тутуһарга туһааннаах астар, медицина тэриллэрэ көрдөрүүгэ турдулар.
Быыстапкаҕа киһи интэриэһин тардар көрдөрүүнэн хаамыска араас көрүҥэ буолла. Манна киһи сэҥээриэх, боростуой маһынан хаамыска буолбакка, уҥуоҕунан оҥоһуллубут остуол оонньуута баар. Ол туһунан Дьокуускайдааҕы интернат-техникум учуутала Капиталина Алексеева кэпсиир.
— Бэйэм саастаах дьоннорго, доруобуйаларынан хааччахтаах социальнай дьиэҕэ сытааччыларга, устудьуоннарга уонна оҕолорго «Өбүгэбит үгэһин үйэтитиэххэ» диэн остуол оонньуутун тарҕатабын. Бүгүн быыстапкаҕа бараан уҥуоҕуттан, туойтан, сыалыһар балык сиһин уҥуоҕуттан уонна халадьыаска туттуллар уҥуохтан оҥоһуллубут хаамыскалары көрдөрө илдьэ кэллим. Былыр өбүгэлэрбит балык сиһин уҥуоҕунан оонньууллар эбит, ону оҕолорго кэпсиибин. Маһынан эрэ буолбакка, арааһынан бары оонньуохха сөп, атын омуктар өрүс тааһынан кытта оонньууллар. Халадьыаска туттуллар уҥуохтан оҥоһуллубут хаамыскалар кээмэйдэрэ араас буолар. Үчүгэйдик бустаҕына, барыта чэпчэкитик киһи ытыһыгар батар, оонньуохха сөптөөх кыра гынан хоҥнон кэлэр. Халадьыас уҥуоҕун ыраастаан баран, бороһуоктаах ууга сытыаран ыраастыыбын, ол кэнниттэн сыта суох буоллун диэн туустаах уонна хартыыһалаах ууга сытыара түһэбин. Онтон дьэ куурбутун кэннэ баҕарар буоллаххына лааҕынан сотуохха сөп. Атыы өттүнэн ыйыттахха, билэр дьон ыйыттаҕына, ылан тарҕатабын. Холобура, туой хаамыскалары билигин Ольга Григорьева салайааччылаах «Көмүлүөк» хампаанньа хаамыска араас кээмэйдэрин оҥоруохтара.
Ити курдук ураты оҥоһууну эһиги эмиэ бэйэҕит оонньуургутугар, тарбахтаргыт былчыҥнарын, түргэҥҥитин сайыннараргытыгар оҥостуоххутун сөп. Саха төрүт остуолун оонньуутун хаалларбакка, үйэлэри уоҥуордаан өссө да илдьэ сылдьыахха!
Анжелина Жданова, оҕо пресс-киинин эдкора.
keskil14.ru