Бүлүү улууһун М.А.Алексеев аатынан Баппаҕаайы оскуолатын 4-с кылааһын үөрэнээччилэрэ күһүҥҥү сынньалаҥнарын туhалаахтык атаарбыттарын туһунан учууталлара Людмила Тарасова билиһиннэрэр.
Алик
Биhиги 4-с кылааска үѳрэнэбит, кылааспытыгар тохсуобут. Учууталбытын кытта биир ватсап группалаахпыт, онно куруук бэйэ-бэйэбитин кытта билсэ олоробут. Күһүҥҥү сынньалаҥмытын бары дьиэҕэ олордорбут даҕаны, туhалаахтык атаара сылдьабыт.
Дьиэҕэ таах сыппат туhуттан, учууталбыт этиитинэн, Инга, Алик, Диана, Айаана интернетинэн математика уонна нуучча тылын олимпиадатыгар кыттан, миэстэлэhэн, диплом, сертификат ылбыттара.
Бүлүүтээҕи «Кэскил» оҕо киинэ тэрийбит онлайн биктэриинэтигэр, оонньууларыгар кыттан, сертификаттары туппуппут.
Нэhилиэкпит бибилэтиэкэтин үлэhитэ А.М.Сидорова ыыппыт «Кинигэ дойдутугар» онлайн квиз күрэҕэр кыттан холоммуппут. Сынньалаҥмыт кэмигэр хас биирдиибит туох дьарыктаахпытын учууталбытыгар кэпсээбиппит.
Айаана Андреева:
— Мин Like приложениеҕа видео кѳрѳбүн. Онно арбалет оҥорор видео тахсыбытын кѳрѳн бэйэбэр оҥосторго санаммытым. Υтүктэн, харандаастарынан кыра арбалеты начаас оҥорбутум, онтукам сатанна, үчүгэйдик ытар. Видеолары кѳрѳн, арааhы бары оҥорорго үѳрэнэбин.
Сандаара Борисова:
— Ийэбэр кѳмѳлѳһѳбүн, ордор бириэмэбэр «Кэскил» хаhыат таайбараҥнарын таайабын, кинигэни ааҕабын.
Владик Васильев:
— Таhырдьа оонньуубун, аҕабар кѳмѳлѳһѳбүн. Кинигэни ааҕабын, кинигэ киhи ѳйүн сайыннарар. Кинигэни элбэхтик ааҕыахтаахпыт.
Алик Платонов:
— Таhырдьа сылаас буолан, салгыҥҥа сылдьабыт, оонньуубун. Күһүҥҥү сынньалаҥ саамай түбүктээх. Кыстыкка бэлэмнэнэн, идэhэ туттабыт, муус ылабыт, сылгыларбытын тутабыт. Мин кыра эрдэхпиттэн дьоммун батыhарбын сѳбүлүүбүн. Ол иhин үлэттэн туора турбакка, барытыгар илии-атах буолабын, кѳмѳлѳһѳбүн. Ыарахан үлэни үлэлии үѳрэннэхпинэ, улааттахпына эт-хаан өттүнэн сайдыылаах, кыахтаах, доруобай, сатабыллаах киhи буолуом.
Диана Иванова:
— Мин сынньалаҥым кэмигэр алмазнай мозаиканан дьарыктанабын.
Саяна Никифорова:
— Мин ырысыаптары кѳрѳн, сѳбүлээбиппин астыыбын. Бэйэм салаат, кекс, пицца, бутерброд астыы үѳрэммитим. Минньигэс астары: кексик, тортик, смузи курдуктары тыыннаҕымсытан, харахтаан уруhуйдуурбун сѳбүлүүбүн.
Инга Петрова:
— Дьиэбэр балтыбын, бырааппын кѳрѳрүм быыhыгар ватсапка киирэн эмоджилары үтүктэн оҥорон кырааскалыыбын.
Эвелина Николаева:
— Мин сынньалаҥмар кинигэни ааҕабын, уруhуйдуубун, ийэбэр кѳмѳлѳһѳбүн, балтылаах бырааппын кытта оонньуубун. Күнүс чугас элгээҥҥэ ынахпытын уулата барабыт, ынахтары аhатабын, окко оонньуубут.
Эмма Константинова:
— Биhиги ийэбит иистэнньэҥ талааннаах буолан, миигин уонна эдьиийбин иистэнэргэ үѳрэтэр. Мин билигин брошканы оҥоробун. Бүтэрдэхпинэ ийэбэр бэлэхтиэм.