Эн үлэһит да буол, биэнсийэлээх да буол, оҕоҕун, кырдьаҕаскын, бары биир киһи курдук, анал байыаннай дьайыыга сылдьар байыстарга көмөлөһөн көрбүттээххит. Туора турбатах, көмөнү оҥорууттан аккаастаммыт киһи суоҕун кэриэтэ. Онтон Дьокуускай куорат олохтооҕо Ирина Егоровна Саввина биир да күн өрөбүлэ суох байыастарга көмөлөспүтэ үһүс сыла.
Кини 2022 сыл балаҕан ыйын 24 күнүттэн волонтерунан үлэлии сылдьар. Маҥнай «Якутия с тобой» уопсастыбаннай хамсааһынтан саҕалаабыт эбит буоллаҕына, 2022 с. алтынньы 1 күнүттэн «Илии сылааһа» хамсааһыны тэрийэн, күн бүгүнүгэр диэри, өрөөбөккө, үлэ үөһүгэр сылдьар. Манна ыал ийэлэрэ, эбэлэрэ, орто саастара 50-60-гар сылдьар Далбар хотуттар, күннэтэ иистэнэр сыахха кэлэн байыастарга аналлаах таҥаһы-сабы тигэллэр. Саамай киэн туттар оҥоһуктара — «Эр хоһуун» диэн ааттаммыт рюкзак-суумка. Бу иһигэр 10-тан тахса таҥас кэмпилиэгэ: ис таҥастан саҕалаан кыһыҥҥы таҥаска тиийэ киирэр.
«Илии сылааһа» диэн сылаастык ааттаммыт хамсааһын сыыппаралара сөхтөрөр. Күн бүгүҥҥэ диэри үс сыл устата:
«Илии сылааһа» сыахтан 5520 байыас таҥныбыт.
104319 км матырыйаал таҥаһа туһаныллыбыт.
Хамсааһын 11 мөл. 56 тыһ. солк сууммаҕа көмө оҥорбут.
138 мөл. солк. сууммаҕа таҥас тигиллибит.
Онтон «Боевые шелкопряды Якутии» хамсааһыҥҥа үксүлэрэ аҕам саастаах дьон сылдьар. Национальнай бибилэтиэкэ дьиэтигэр баар филиалын салайааччыта Тамара Дмитриевна Попова 80 хаарыгар үктэммит.
— «Боевые шелкопряды Якутии» хамсааһын үс сылын олунньуга туолар. Салайааччыларбыт Марина Иннокентьевна, Сергей Ефимович Васильевтар буолаллар. Өрөспүүбүлүкэбит үрдүнэн хас биирдии улууска филиаллардаахпыт. Биһиги филиалбыт Национальнай бибилэтиэкэ төрдүс этээһигэр үлэлиир. Күннэтэ онно мустан, байыастарга сылгы сиэлиттэн, кутуругуттан араас оҥоһуктары оҥорон байыастарга ыытабыт. Саамай биһирэммит оҥоһукпут — сиэлтэн өрүллүбүт атах таҥаһын угунньата. Бу ууну оборбот, аны туран эмтээх буолар. Угунньаны араас матырыйаалы кытары (таҥас, мутон, утеплитель) дьүөрэлээн оҥоробут. Бэйэбит оҕолорбутуттан ордон, атын эрэгийиэн байыастара эмиэ сакаастыыллар. Барыларыгар ыытабыт. Онон өбүгэбит былыргыттан илдьэ кэлбит өрүү таҥаһа байыастарбытын абырыыр, — диэн кэпсиир аҕам саастаах волонтер.
Дьокуускай куоракка алтынньы 29-31 күннэригэр Кыайыы волонтердарын өрөспүүбүлүкэтээҕи форума ыытылла турар. Форум араас эйгэ волонтердарын биир былаһааккаҕа түмэр, сомоҕолуур.
Сиһилии видеону көрүҥ:
keskil14.ru