Дьокуускай куоракка алтынньы 30 күнүгэр #МЫВМЕСТЕ Волонтердар өрөспүүбүлүкэтээҕи форумнарын иһинэн Н.Д. Неустроев аатынан SMART-библиотекаҕа «Работа с семьями участников СВО» диэн сэһэргэһии, кэпсэтии буолан ааста.
Тэрээһини Дьокуускайдааҕы медицинскэй колледж дириэктэрин иитэр үлэҕэ солбуйааччыта Наталья Михайловна Кондратьева иилээн-саҕалаан ыытта. Оттон спикердэринэн бу эйгэҕэ үлэлии сылдьар «Защитники Отечества» судаарыстыбаннай пуонда Саха сиринээҕи филиалын салайааччытын солбуйааччыта Симона Симоновна Томская уонна Өлүөхүмэтээҕи «Сила Добра» волонтер кулуубун салайааччыта Лилиана Иннокентьевна Перевалова буоллулар.
Анал байыаннай дьайыы саҕаланыаҕыттан байыастарга, кинилэр дьиэ кэргэттэригэр уонна бойобуой дьайыы бэтэрээннэригэр биһиги өрөспүүбүлүкэбитигэр олус элбэх көмө оҥоһуллар. Ол курдук, араас пуондалар, уопсастыбаннай холбоһуктар, волонтердар баар буолбуттара. #МЫВМЕСТЕ Бүтүн Арассыыйатааҕы аахсыйа Саха сиринээҕи ыстааба тэриллэн, Дьокуускай куоракка уонна улуустарга 36 муниципальнай тэрилтэҕэ үлэтин ыытар. Ону тэҥэ гуманитарнай көмө кииннэрэ тиһиктэрин быспакка үлэлии тураллар. «Боевые шелкопряды», «Якутия с тобой», «Добровольцы Якутии», «Внуки победителей» уо.д.а. волонтердар түмсүүлэрэ өрөспүүбүлүкэ араас муннугар бааллар.
Өрөспүүбүлүкэ үрдүнэн 5793-тэн элбэх көмө көрдүүр сайаапка көрүллүбүтэ. Билигин 883 дьиэ кэргэни волонтердар түмсүүлэрэ, кииннэрэ арыаллыыллар.
Симона Симоновна Томская «Защитники Отечества» судаарыстыбаннай пуонда Саха сиринээҕи филиала үлэтин туһунан сырдатта. Пуонда Арассыыйа бэрэсидьиэнэ Владимир Владимирович Путин уурааҕынан 2023 сыллаахха арыллыбыт.
Биһиги пуондабыт сүрүн хайысхата – сырдык тыыннара быстыбыт байыастар дьиэ кэргэттэрин уонна бойобуой дьайыы бэтэрээннэрин комплекснай социальнай арыаллааһын. Быйыл биһиэхэ сураҕа суох сүппүт саллааттар дьиэ кэргэттэрин кытта үлэлэһии киирдэ. Маны таһынан, биир сүрүн хайысхабытынан уопсастыбаннай бырайыак буолар. Ол эбэтэр сырдык тыыннара быстыбыт байыастар дьиэ кэргэттэрин уонна бойобуой дьайыы бэтэрээннэрин дойдуһа ыччаты иитиигэ туһуламмыт бырайыактарга, култуурнай уонна спортивнай тэрээһииннэргэ, Аҕа дойдуну көмүскээччилэр ааттарын үйэтитиигэ угуйуу буолар. Ол курдук, 2025 сыл саҕаланыаҕыттан байыастар дьиэ кэргэттэрэ уонна бойобуой дьайыы бэтэрээннэрэ кыттыылаах 359 тэрээһини ыыттыбыт. Холобур, быыстапкалары, маастар-кылаастары тэрийэбит, дьоруойдар пааркалара, өйдөбүнньүк дуоскалар арыллыыларыгар күүс-көмө буолабыт. 2023 сылтан «Отец солдата» диэн сырдык тыыннара быстыбыт байыастарбыт амарах аҕаларыгар мэтээл биэрэр буоллубут. Оттон ийэлэргэ 4 куоратынан сынньанар «РЖД Тур» көрүллэр.
Лилиана Иннокентьевна Перевалова волонтер үлэтигэр хайдах кэлбитин уонна кулууп үлэтин кэпсээтэ.
Кулууппутун «Сила добра» диэн ааттаабыппыт. Улахан аҥаарбыт, биллэн турар, аҕам саастаах, биэнсийэлээх дьон. Ол эрээри эдэр дьоммут, ыччаппыт кыра да көмөҕө наадыйдахпытына, хаһан да аккаастамматтар, куруук илиилэрин ууналлар. Биһиги илиибитинэн харысхаллары быысыбайдыыбыт, уопсайа 21 араас таҥаһы тигэбит. Ону тэҥэ байыастарбыт дьиэ кэргэттэрин кытта ыкса үлэлэһэбит. Ол курдук, бырааһынньыктары тэрийэбит. Холобур, Саҥа дьылга оҕолорго бэлэх биэрэбит, кинилэри кытта оонньуубут. Тыыл бэтэрээннэрин эмиэ умнубаппыт, куруук көмөлөһө турабыт.
Спикердэр ыччаты, истээччилэри дьоҥҥо болҕомтолоох буоларга ыҥырдылар.
keskil14.ru