Олунньу 19 күнүгэр Үөһээ Бүлүү улууһун Дүллүкү оскуолатыгар улуустааҕы “Снежный барс” байыаннай-патриотическай оонньуу ыытылынна. Сыала-соруга: байыаннай-патриотическай иитиини, чөл олоҕу ыччакка пропагандалааһын, ыксаллаах быһыыга-майгыга көмөнү оҥорорго бэлэм буоларга, Россия аармыйатыгар, быраабы көмүскүүр уорганнарга, баһаарынай сулууспаҕа, МЧС подразделениетыгар сулууспалыырга ирдэниллэр хаачыстыбалары оҕо саастан иҥэринии; байыаннай-спортивнай түмсүү салайааччыларыгар хардарыта уопут атастаһалларыгар усулуобуйаны тэрийии.
Биһиги оскуолабыт байыаннай-патриотическай хайысхаҕа үгүс үлэни ыытар. ОВС (основы военной службы) уруоктара тэрээһиннээхтик, олус сэргэхтик буолаллар. Гражданскай оборонаны барарбытыгар химическэй сэби-сэбиргэли, автоматтары, истребителлэри үөрэтэбит, бастакы көмөнү хайдах оҥорорго, о.д.а. уһуйаллабыт.
Оҕолор VIII кылаастан саҕалаан, Калашников автоматын ыһарга-хомуйарга, оттон Х-XI кылаас уолаттара илиинэн охсуhарга дьарыктаналлар.
Ыйга биирдэ строевой хаамыыны көрүү буолар. Онно кадеттар (VIII-IX кыл.) уонна курсаннар (X-XI) тус-туспа куоталаһаллар. Көрүҥнэрэ: ырыалаах тэҥник хаамыы, бириэмэҕэ автомат ыһыыта-хомуйуута, о.д.а. Кылгас бириэмэҕэ сорудаҕы сөпкө толорбут кылаас бүтэһиккэ кыайыылаах тахсар.
Курсаннар хара, кадеттар эриэн өҥнөөх формалаахтар. Бэрээдэги тутуспатаххына, нэрээт ылаҕын, хаар күрдьэҕин. Маны таһынан курсаннар военизированнай эстафетаҕа күрэхтэһэллэр: ытыыга, «Калашниковы» ыһыыга-хомуйууга, икки оҕо «эмсэҕэлээбиккэ» противогаз кэтэрдэн, наһыылкаҕа көтөҕөн, бастакы көмөнү оҥороллор.
Былырыыҥҥыттан оскуолабытыгар байыаннай үөрэхтээhиҥҥэ эдэр учуутал Радомир Алексеевич Руфов үлэлиир.
Дүллүкүлэр сылын аайы өрөспүүбүлүкэҕэ ыытыллар «Снежный барс» байыаннай-патриотическай оонньууга ситиһиилээхтик кыттабыт. Военрукпут Радомир Алексеевич, итиэннэ Владимир Николаевич, Иннокентий Вячеславович эрдэттэн бэлэмнииллэр.
Оскуола хамаандата 11 оҕоттон састааптаах буолар. Сүүрэр, строевой хаамыыга үчүгэй, дойду байыаннай историятын билэр, КСУ-га (кыргыттар пресс хачайдыыллар, уолаттар турникка тардыналлар) кыанар буоллаххына эрэ хамаандаҕа киирэҕин. Күрэхтэһии кэмигэр көрүннэргэ барытыгар инники сырыттаххына эрэ бастыыгын. Бу олус элбэх илистиилээх үлэттэн, эрчиллииттэн тахсарын кыттыбыт оҕолор үчүгэйдик билэллэр.
Биһиги оскуолабыт курсаннара икки сыл өрөспүүбүлүкэҕэ бастаан, «Океан», биирдэ III миэстэ буолан, «Орлёнок» лааҕырдарга сынньанар чиэскэ тиксибиттэрэ.
Парашют кулуубугар (сал. В.Н. Николаев)1989 сылтан 450-ча оҕо, улахан дьон дьарыктанан кэллэ. Разрядтаах парашютистар бэлэмнэннилэр. 10-тан тахса оҕо авиация хайысхатынан орто уонна үрдүк үөрэҕи бүтэрэн үлэлииллэр. Билигин Дьокуускайдааҕы авиационнай-техническэй училищеҕа Лебедкина Надя «авиационная безопасность», Айсен Лебедкин техник-приборист идэтигэр үөрэнэ сылдьаллар.
Радомир Алексеевич Руфов, Дүллүкү оскуолатын военруга:
—Оскуола оҕото кыра эрдэҕиттэн төрөөбүт дойдутугар бэриниилээх буоларга иитиллэн тахсыахтаах. Кини Россия патриота буола улаатыахтаах. Бу күрэхтэһиибит оҕону эт-хаан өттүнэн сайыннарар. Уолаттар аармыйаҕа баралларыгар бэлэмнээх буолаллар. Холобура, строевой хаамыыга, военизированнай эстафетаҕа, автоматы ыһыыга-хомуйууга эрдэттэн бэлэмнээҕэ сулууспаҕа эргиччи туһалыыр. КСУ олус наадалааҕын бэйэбинэн да билэбин. Маннык күрэхтэһиилэргэ оҕолор бэйэлэрин көрүнэргэ уонна хамаанданан үлэлииргэ үөрэнэллэр.
Михаил Васильевич Ан, күрэхтэһии кылаабынай судьуйата:
—«Снежный барс» ыччаты байыаннай-патриотическай тыыҥҥа иитэр. Дүллүкү уонна Yөhээ Бүлүү өрөспүүбүлүкэтээҕи гимназиятын хамаандалара инники күөҥҥэ сылдьаллар. Хамаанда биир тыынынан кыттар буоллаҕына эрэ ситиһиилэнэр.
Семен Семенович Харбаев, Боотулуу оскуолатыгар физкультура, ОБЖ учуутала:
—Патриотическай иитии диэн саамай наадалаах. Оҕо Ийэ дойдутун көмүскээччи буола улаатыахтаах. “Снежный барс” уол оҕону аармыйа кэккэтигэр сулууспалыырга бэлэмниир. Улуус үөрэнээччилэрин икки ардыларыгар доҕордуу сыһыан үөскүүрүгэр олук буолар.
Владимир Николаевич Николаев, подполковник, Дүллүкүтээҕи парашютнай кулууп салайааччыта:
—Күрэхтэһии сүрдээх тыҥааһыннаахтык барда. Оҕолор кыах баарынан кытыннылар. Түмүккэ 15 очукуолаах Дүллүкү “Десантник” хамаандата бастаата. Иккис миэстэни Үөһээ Бүлүү гимназията ылла (24 очукуолаах). Маҥаастар үһүстээтилэр (37 очукуолаахтар).
“Эрчим” пост эдэр кэрэспэдьиэннэрэ.,
Дүллүкү, Үөһээ Бүлүү.