Тааттаҕа буола турар XXII-с «Манчаары оонньууларыгар» Баайаҕа нэһилиэгин баһылыгынан 20 сыл дьоһуннук үлэлээбит салайааччы, «XX үйэ чулуу мадьыныта», мас тардыһыыга СӨ маастара, СӨ муниципальнай сулууспатын туйгуна, XV, XVI Манчаары оонньууларын муҥутуур кыайыылааҕа Роман Романович Романов сырдык аатынан күрэс төрүт көрүҥнэригэр XXII-с «Манчаары оонньууларыгар» мас тардыһыы көрүҥэр 70 киилэлээхтэргэ уонна бастыыр иһин муҥутуур күрэххэ улахан бириистэр туруорулуннулар.
Ол курдук, «Аар Дархан» муҥутуур кыайыылаахха СӨ мас тардыһыытын федерацията, Таатта улууһа уонна Баайаҕа нэһилиэгэ кыттыһан 1,5 мөлүйүөн сууммалаах Toyota WISH массыынаны туруордулар. Оттон финалга тахсыбыт иккис үрдэллээххэ Баайаҕа нэһилиэгин аатыттан харчынан бириис олохтонно. Маны таһынан, 70 киилэ ыйааһыҥҥа муҥутуур кыайыыны ситиспит мадьыныга Баайаҕа сылгыһыттарын көҕүлээһининэн уонна көмөтүнэн 4 убаһа бириис турда. Ытыктабыллаах баһылык, чулуу спортсмен Роман Романович Романов сырдык кэриэһигэр ыытыллар күрэхтэһиигэ спонсордаабыт, харчынан күүс-көмө буолбут Баайаҕа нэһилиэгин дьоно-сэргэтэ уопсайа 587000 солкуобай уу харчынан уонна 4 убаһанан улахан көмө оҥордулар.
Бүгүн, от ыйын 10 күнүгэр, Ытык Күөлгэ саҥа тутуллубут «Дьулуруйар Ньургун Боотур» киэҥ уораҕайга мас тардыһыы күрэҕэр бу бириистэр хаһаайыттарын быһаарар тыҥааһыннаах киирсиилэри көрдүбүт. Күрэсчиттэр ардахтан, тымныыттан саллыбакка, «Аар Дархан» муҥутуур кыайыылааҕын аатыгар кииристилэр. Хас биирдии күрэстэһээччи кыайыы туһугар тиритэн-хорутан, араас албастары туттан, дьиҥ мадьыны буолалларын көрдөрдүлэр. Мөккүөрдээх, тыҥааһыннаах киирсиилэр кэннэ муҥутуур кыайыылаахтар ааттара туох да саарбаҕа суох ааттанна.
Ол курдук, 70 киилэ ыйааһыҥҥа Баайаҕалар туруорбут 4 убаһа бирииһин бэйэлэрин бэйэлээх уоллара, Баайаҕа мадьыныта, Арассыыйа спордун маастара, «Манчаары оонньууларын» икки төгүллээх муҥутуур кыайыылааҕа Константин Жирков ылары ситистэ. Оттон массыына хаһаайынынан, «Аар Дархан» анал аатынан Үөһээ Бүлүү улууһун күүстээх мадьыныта Эрчим Баппаҕай түмүк киирсиитигэр Таатта улууһун биир биллэр мадьынытын Никита Татариновы кыайан, ылла. Онон Баайаҕалар туруорбут анал бириистэрэ Баайаҕаҕа уонна Үөһээ Бүлүү улууһугар айаннаатылар.
Саха сирин чулуу мадьыныта Роман Романович Романов сырдык кэриэһигэр анаммыт анал аат, сыаналаах бириистэр хаһаайыттарын бу күн биллибит. Мас тардыһыы көрүҥэ күнтэн күн, сылтан сыл аайы сайдар, тупсар, элбэх көрөөччүнү муһар.
Сиһилии видео-матырыйаалбытыгар көрүҥ:
Мария Сибирякова суруйуута, 11 кылаас, С.К. Макаров аатынан Чурапчы гимназията,
Дарина Иванова видеоҕа устуута уонна таҥыыта, 9 кылаас, Хаптаҕай, Мэҥэ Хаҥалас, «Кэскил» оҕо медиа киинин эдэр кэрэспэдьиэннэрэ