Амма улууһун Чакыр нэһилиэгэр Аҕам саастаахтар декадаларын чэрчитинэн оскуола үөрэнээччилэрэ аҕам саастаахтарга дьиэлэригэр ыалдьыттаатыбыт. Кинилэргэ анаан хомоҕой хоһооммутун, ылбаҕай ырыабытын толордубут. Ийэлэрбит астаабыт күһүҥҥү астарынан, аҕаларбыт бултаабыт бултарыттан күндүлээтибит. Бэйэбит илиибитинэн оҥорбут аккырыыккаларбытын бэлэх ууннубут, мас саһааннаан көмөлүстүбүт.
Ол курдук, II уонна VI кылаастар нэһилиэкпит талааннаах иистэнньэҥэ Матрена Иннокентьевнаҕа, III кылаас оҕолоро Галина Иннокентьевнаҕа, IV кылаастар Марина Софроновнаҕа, VII кылаас үөрэнээччилэрэ эбээлэригэр уонна эһээлэригэр Анна Алексеевнаҕа, Анна Николаевна уонна Василий Федорович Федоровтарга, Акулина Ивановна уонна Иннокентий Иннокентьевич Шепелевтарга, VIII кылаастар Евдокия Иннокентьевнаҕа уонна IX кылаас оҕолоро Галина Владимировнаҕа сырыттыбыт.
Ытык аҕам саастаах дьоммут олус үөрэ көрсөн уонна сэһэргэһэн, күннээҕи сонуну үллэстэн, үөрэ-көтө кэпсэттибит. Баҕарабыт баай тиит кэриэтэ тирэхтээхтик тирэнэн, үтүө санааҕытынан салайтаран, оҕолоргутугар -сиэннэргитигэр сүбэ-ама буолан чэгиэн чэбдик сылдьаргытыгар!
Чакыр орто оскуолатын «Сарыал» медиа киин эдкордара,
Амма улууһа.
keskil14.ru