Феодосий Федорович Попов 1925 сыллаахха тохсунньу 1 күнүгэр Мэҥэ Хаҥалас улууһун I-Баатара нэһилиэгэр күн сирин көрбүтэ. Аҕата Баатараттан төрүттээх Елисей Иванович Корякин, ийэтэ Доллуттан төрүттээх Анна Михайловна Фадеева.
1942 с. «Түмсүү» холкуостан Төҥүлүгэ МТС-ка тырахтарыыстар куурустарыгар үөрэммит, бүтэрэн баран «Социализм» холкуоска ананан, Балыктаах үөһэ Мөрүөннэри кытта быыcahap сиргэ Түөчэгэнэ диэн бааһынаны хоруттарбыт. Бу саҕана «Социализм» холкуос бурдук ыһыытыгар оройуоҥҥа бастыҥ көрдөрүүлээҕинэн биллэрэ. 1943 с. үлэтин түмүктээн, Төҥүлү МТС-гар киирэн, сайын тыраахтарын өрөмүөннүү сырыттаҕына, Дьокуускайга маһынан барар ГАЗ тыраахтары ыытар кууруска үөрэттэрэ ыыппыттар. Үөрэҕин бүтэрэн тахсан, Дьабыылга «Үүнэр күүс» холкуоска үлэлии барбыт. «Ампаардаах» диэн сири тиэрдэрбит. Күннээҕи сорудаҕын наар 200 % толорон хайҕаммыт. Ити сайын сааһын ситэн, бааһынаттан аармыйаҕа ыҥырыллан сэриигэ барбыт. Иркутскайга тиийбиттэрин кэннэ, 1924-1925 сыллаах төрүөхтэри араартаан хаалларбыттар. Аҕа саастаахтары арҕаа уоттаах сэриигэ атаарбыттар. Хаалбыт дьону Монголияҕа ыыппыттар. Забайкальскай байыаннай уокурук 284-с стрелковай дивизия 1095-с стрелковай полкатыгар Улахан Хингаҥҥа, 87-с туспа СП муора пехотатыгар сулууспалаабыт.
Сэрии бүппүтүн кэннэ Монголиянан, Соҕуруу Сахалинынан Совгаваҥҥа, Владивостокка, Золотой Бухтаҕа сулууспалаабыт. 1948 с. атырдьах ыйыгар төрөөбүт дойдутугар төннөн кэлбит. Биир ый сынньанан баран, Төҥүлүгэ МТС-ка үлэлии барбыт. 1958 с. Төҥүлүгэ МТС эстэн, Баатара сүнньүгэр баран үлэлии сылдьар тиэхиньикэни барытын илдьэ хаалан, тырахтарыыстар биригээдэлэригэр биригэдьиирдээбитэ.
1959 с. Төхтүргэ көһөн киирэн бөдөҥсүйбүт Дьоруой Попов аатынан холкуос Төхтүрдээҕи учаастагар мэхээнньигинэн үлэлээн барбыта. Онтон сантехниктар биригээдэлэрин биригэдьииринэн ананан, Сыымах кулуубун, гарааһын, Төхтүр мастарыскыайын, хас да хотону мантаастаан үлэҕэ киллэртэрбитэ. Кэлин Дьоруой Попов аатынан сопхуоска өр сылларга киин мастарыскыайга сэбиэдиссэйдээбитэ, силиэсэрдээбитэ аппаратурщиктаабыта. 1980 с. биэнсийэҕэ тахсан баран, 1993 с. диэри мастарыскыайга үлэлээбитэ.
1950-1951 сс. улахан курааннар тураннар, «от сии» диэн, холкуос сүөһүтүн Горнай оруйуонугар көһөрүүгэ барсыбыттар. Эдьиийинээн Маайалыын, кини кыыһынаан Матреналыын бүтүн дьиэ кэргэнинэн тиийэн сүөһү көрбүттэр.
1952 с. олоҕун аргыһынаан Феодосийдыын олохторун холбообуттара. 1959 с. Төхтүргэ еөһөн киирэн баран, Дьоруой Попов аатынан холкуоска оҕуруокка үлэлээбитэ. Кэнники сылларга Төхтүр интиринээтигэр повардаабыта.
Попов Феодосий Федорович, Попова Евдокия Степановна күүтүүлээх оҕолоро буолаллар Октябрина Неустроева, 1954 сыллаахха төрөөбүтэ. Идэтинэн булгахтер буолар. Ону туоһулуур элбэх туоһу суруктардаах, наҕараадалардаах. Олоҕун аргыһынаан Анатолий Ильич Неустроевтыын оҕолоохтор, сиэннээхтэр.
Попов Юрий, 1956 сыллаахха төрөөбүтэ, 2010 с. күн сириттэн туораабыта. Кини бэйэтэ илиитигэр талба талааннаах, кыһыл көмүс илиилэрдээҕэ. Тус көрүүлээх үлэлэрэ дьону сөхтөрөллөрө, интириэһиргэтэллэрэ.
Иккис кыыһа Мария Захарова буолар, 1960 сыллаахха төрөөбүтэ. Кыыһа аҕатын маннык тылларынан ахтан санаан ааһар:
– Оҕо сааһым умнуллубат түгэнинэн тээтэбин кытта, кини Техничка диэн сырдык фургоннаах массыынатынан олорсон ханна ыҥырыы баарынан барсарым. Механик буолан ханна техника алдьаммытын көрө өрөмүөннүү, саппаас чаас илдьэ барара. Онно саамай дьиктиргээн, сэҥээрэн көрөрүм кини наар укта сылдьар мутук маһынан улэлии турар техника мотуорун даҕайан иһиллиирэ уонна онон көрөн өрөмүөннүүрүн. Улаатан баран бииргэ оттуурбутун, сир аһын бииргэ хомуйарбытын, айылҕаҕа истиҥ сыһыаны тапталы иҥэрбитин наһаа күндүтүк саныыбын. Тээтэм сатаабата диэн суох этэ. Тимиринэн уһанара. Билигин да элбэх ыалга тээтэм оҥорбут муус көйөрдөрө, анньыылара, аан хатыырдара туттулла, кини аатын ааттата тураллар.
Сэриигэ сылдьыбытын туһунан мээнэ ахтыбат этэ. Арай Япония сэриитигэр сылдьан уһуннук сатыы хаамалларын ахтара. Ол сылдьан аччыктаан, үгүс киһи тэллэй сиэн, сүүһүрэн өлбүттэрин кэпсиирэ, ол иһин тэллэйи хомуйарбытын, сиирбитин кэрэхсээбэт, сөбүлээбэт да этэ. Тээтэм табахтаабат буолан биэрэрэ, табахтарын аска атастаһара үһү.
Мария уонна кэргэнэ Николай Иванович Захаров, билигин икки кыыс ийэлээх, аҕата, элбэх сиэннэр уонна хос сиэн эбээлээх, эһээтэ буолан олороллор.
Иккис уола Николай Попов, 1964 сыллаахха төрөөбүтэ. Идэтинэн үлэҕэ үөрэтэр учуутал. Билигин Мэҥэ Хаҥалас IT-кубун дириэктэринэн үлэлии хамныы сылдьар. Кэргэнинээн Неустроева Валентина Дмитриевналыын уоллаах, кыыс, ийэлээх, аҕата, элбэх сиэн эбээлээх эһээтэ буолан олороллор.
Ахтыыны суруйдулар Феодосий Федорович, Евдокия Степановна Поповтар
оҕолоро, сиэннэрэ, хос сиэннэрэ.