Чөркөөххө Төрөөбүт тыл, сурук-бичик күнүн Государственность музейыгар олохтоох библиотека, норуот айымньытын дьиэтэ, музей кыттыһан тэрийдилэр.
Быйылгы Х төгүлүн ыытыллар ааҕыылар СӨ үөрэҕириитин үтүөлээх, РФ Үрдүк профессиональнай үөрэҕириитин бочуоттаах үлэһитэ, Таатта улууһун ытык киһитэ, тыыл бэтэрээнэ, литературовед, литературнай критик, норуокка киэҥник биллибит «Саха ырыата», «Ньургуһуннар» диэн ырыалар ааптара Василий Никитич Протодьяконов олоҕор, үлэтигэр ананна.
Учууталбыт айымньылаах үлэтин, кэрэмэс майгытын тула ахтыылары, дакылааттары, оҕолор чинчийиилэрин умсугуйа иһиттибит.
А И Софронов-Алампа «Саха ырыата» хоһоонун ааҕыылар кыттыылаахтара күргүөмүнэн толорон, флешмобка кытынныбыт. Бу хоһоон Таатта улууһун гимнэ буолбута, матыыбын В.Н. Протодьяконов суруйбута.
Норуот таптыыр «Ньургуһуннар» ырыатын «Далбар» түмсүү толорон, тэрээһин ис хоһоонугар иэйии умсулҕанын сахта. Публичнай ааҕыы кыайыылааҕынан саха тылын, литературатын учуутала М.П. Бондарева ааттанна.
Мотрена Яковлева.
Чөркөөх, Таатта.