Бүгүн биһиэхэ Горнай улууһугар оскуола оҕолоругар ыытыллыбыт «Первые шаги к предпринимательству» диэн күрэх лауреата Александр Николаев ыалдьыттыыр. Кини С.И.Тимофеев – Кустуктаанап аатынан Маҥаны орто оскуолатын VIII кылааһын үөрэнээччитэ.
Маҥнайгы хардыым
Эргиэҥҥэ бастакы хардыым – пеноплаһынан ынах ыырга аналлаах кыракый олоппостору оҥоруу. 300 солк., сороҕун хаалаан 1000 солк. атыылаабытым. Саҥа оскуола тутуутуттан ордубутун туһаҕа таһаарарга санаммытым. Мас олоппос кытаанах уонна тымныы, онтон пенопласт ыйааһына чэпчэки, сымнаҕас. Оҥорорго да сүрдээх боростуой. Хас биирдии киһи сатыан сөп.
Айылҕа бэлэҕэ
Маны таһынан, туой оҥоһугунан иккис сылын дьарыктанабын. Туойбутун бэйэбит нэһилиэкпит Маалыкай диэн алааһыттан ылабыт. Туойтан тугу баҕар оҥоруохха сөп. Ордук харысхаллары оҥорорбун ордоробун. Быйыл XXI төгүлүн ыытыллыбыт Манчаары оонньууларыгар анаан магниттары, харысхаллары оҥорон атыылаатым.
Ситиһии!
2019 сылтан саҕалаан үлэлээбит харчыбын мунньан быйыл мотоцикл атыыластым. Өссө таһаарыылаахтык үлэлээн фотоаппарат ылыахпын баҕарабын.
Бэлэмнээтэ Нюргуяна Захарова