Бүгүн аны бүтэй дорҕооннору үөрэтэбит. Саха төрүт тылыгар 8 кылгас аһаҕас, 8 уһун аһаҕас, 4 дифтонг, 19 бүтэй дорҕоон, 11 хоһулаһар бүтэй дорҕоон буукубалара бааллар.
Бүгүн бүтэй дорҕооннору оҕо суруйааччыта Мусьяна Сосина хоһоонунан дьүһүйүүтүнэн ааҕабыт уонна үөрэтэбит. Оҕолоргутугар сахалыы ааҕыҥ, сахалыы хоһооннору үөрэтэ сылдьыҥ!
Бүтэй дорҕооннор
Ааптар Мусьяна Сосина
Бб
Балыксыт Бааска
Балыктаабыт,
Байанай барахсан
Бэрсээхтээбит.
Гг
Груша сиирбин таптыыбын,
Груня кыыска бэрсэбин.
Груша олус минньигэс,
Иһэ олус сымнаҕас.
Ҕҕ
Баҕа, баҕа оҕочоон,
Баҕанаҕа тахсыбыт.
Аҕа баҕа оҕотун
Баҕанаттан түһэрбит.
Нн
Нэтээги көтөр утуйбат,
Нухарыйан сынньаммат.
Тирии кынатын саратар,
Мэкчиргэттэн эрэ саллар.
Бб
Балыксыт Бааска
Балыктаабыт,
Байанай барахсан
Бэрсээхтээбит.
Дд
Дайаана Дууньалыын
Доҕотторун көрсүбүттэр,
Денистаах Даниллыын
Дуоһуйа дьаарбайбыттар.
Дьдь
Дьэдьэни дьэдьэнньиттэр
Дьаарбайа сылдьан булбуттар.
Дьиэлэригэр аҕалбыттар
Дьэдьэннээх күөрчэх сиэбиттэр.
Йй
Маайа хайаҕа, ыттыма,
Чыычаах уйатын тыытыма.
Айыы-айа буолуоҕун,
Уйа-хайа суох ытыаҕын.
Кк
Күн саһан көөчүктэнэр,
Куобахчаанныын оонньоһор.
Куобах саһар ойуурдаах.
Күлүк түһэр куруҥнаах.
Лл
Лаампа уотугар Лаанчык
Тыҥыраҕын лаахтанар,
Лааҕа лаах да, лаах
Олус аһыы сыттаах.
Мм
Мап-мааны моҕотой
Моттоллон олорор,
Мичээрдээн мытырыйар
Маанытыттан манньыйар.
Мин оонньуур мэкчиргэм,
Мап-мааны олбохтоох,
Минньигэс мичээрдээх,
Мэхээчэ диэн ааттаах.
Нн
Носорог муннугар муостаах,
Наһаа сымнаҕас майгылаах,
Носорогу уруһуйдуоҕум,
Ноннаҕа бэлэхтиэҕим.
ҥ
Тииҥ, тииҥ, тииҥчээним,
Тиҥилэҕэ кып-кырачаан,
Ол эрээри иҥиирдээх,
Тииҥ күүстээх тиҥилэхтээх.
Ньнь
Ньургуйаана,Ньургуннуун
Ньургуһуннуу ойдулар,
Толоон, сыһыы ньууругар
Ньургуһуннаан үөрдүлэр.
Пп
Пингвин уолаттар
Парадтыы хаамсаллар,
Туора-маара ыстамматтар,
Бэрээдэги кэспэттэр.
Рр
Тимур тыаҕа тахсан
Туртаска түбэспитэ,
Туһахха иҥнибитин
Тута быыһаабыта.
Сс
Сайылыкпар сандааран,
Сардааналар тыллаллар,
Сахам сирин сайынын
Симэх тиһэ симииллэр.
h
Һэ-һэ-һээ эһэ үөрдэ
Саас кэлэн уһугунна,
Оһуохайдыан баҕарда,
Доҕотторун ыҥырда.
Тт
Табабын харыстыыбын,
Туйахтарын ыраастыыбын,
Тибииттэн толлубат
Табабын таптыыбын.
Хх
Хаххан хара тыаҕа
Ханна олороруй?
Хабыс хараҥаҕа
Хайдах бултууруй?
Чч
Чы-чы-чы чыычаах,
Чо-чо-чо чоргуйар,
Ча-ча-ча чараас
Кынатын саратар.
2022 сыл.