Дьокуускай куоракка Бүлүүлүүр тракт 44 килэмиэтиригэр уон тыһыынча бэс үүнээйитин олортулар. Ойууру чөлүгэр түһэрэр үлэ «Экология» национальнай бырайыак чэрчитинэн ыытыллар.
Тэрээһиҥҥэ Ил Дархан Айсен Николаев, бастакы вице-премьер Дмитрий Бердников, Дьокуускай куорат баһылыга Евгений Григорьев, ону таһынан үлэ кэлэктииптэрэ, волонтердар, олохтоохтор кыттыыны ыллылар.
Үтүө хамсааһын бүтүн Арассыыйатааҕы «Ойууру харыстыах» аахсыйа чэрчитинэн ыытыллар.
«Бүлүүлүүр трасса карьерыгар мас олордон айылҕабытын чөлүгэр түһэрэр үлэҕэ бу үтүө саҕалааһын буолар. Эстафетаны Горнай улууһуттан тутан, салгыы атын оройуоннар холобур оҥостон, айылҕаны харыстыыр туһугар саҥабытынан буолбакка, үлэбитинэн, дьыалабытынан көрдөрөр кэммит кэллэ», — диэн Айсен Николаев мустубут дьоҥҥо туһаайан эттэ.
Дьокуускай куорат баһылыга Евгений Григорьев куорат олохтоохторугар көхтөөх кыттыыны ылбыттарыгар махтанан туран: «Бу үтүө дьыала салгыы салҕана турдун», — диэн баҕа санаатын тиэртэ.
«Бу сайын буолбут баһаар улахан хоромньуну аҕалла. Ойуур хаһаайыстыбатын үлэһиттэрэ баһаарга ыам ыйыттан саҕалаан, өрөбүлэ суох, ыарахан уонна кутталлаах үлэҕэ сырыттылар. Биһигини кытары 1000-тан тахса Сахабыт сирин олохтоохторо күргүөмүнэн, ойуур баһаардара турбуттарыгыр, бары бииргэ баһаары утары охсустулар. Маны таһынан атын эригийиэн баһаарынайдара кэлэн бары бииргэ үлэлэлээтилэр. Айылҕаны чөлүгэр түһэрии билигин олус ыарахан буолуо. Бу кыра-кыра кэрдиистэн саҕаланар үлэ. Саха сирэ искусственнай ойууру олордор уопута суох. Биһиги ирбэт тоҥҥо турар ойуурбут маһа чыҥха атыттар. Бу федеральнай аахсыйа дойдубут үрдүнэн ыытыллара улахан суолталаах тэрээһин. Эдэр ыччат маннык ыытыллар үтүө дьыалаҕа көхтөөх буолуҥ, айылҕабытын харыстыырга бары күүһү ууруохха», — диэн өрөспүүбүлүкэ ойуурун хаһаайыстыбатын бэтэрээнэ Саргылана Аммосова тыл эттэ уонна кэнчээри ыччакка туһаайан бэйэтин санаатын хоһоонунан тиэртэ. Салгыы видеоҕа көрүҥ:
Онтон бу номнуо биллибит хаартыскаҕа Ил Дархан Айсен Сергеевич 10 №дээх оскуола 1-в кылааһын үөрэнээччитин Айсен Михайловы кытары мас олордоллор.
Айсен Михайлов уопсастыбаннай добровольческай штаб волонтерын Алена Ивановна Михайлова кыра оҕото. Аҕалара Артем Егорович Михайлов рентген-быраас. Үс оҕолоох, олоххо актыыбынай көрүүлээх ыал. Бу күн оҕолорун кытары Михайловтар үтүө дьыала аахсыйатыгар кытыннылар. Уонна Ил Дарханы кытары соһуччу уоллара Айсен хаартыскаҕа түспүтүттэн үөрэн-көтөн тарҕастылар. Онон бу хаартысканы «Икки Айсеннар» диэн ааттыахха да сөп курдук.
Бүтүн Арассыыйатааҕы «Ойууру харыстыах» үтүө хамсааһын аахсыйата салҕанар, туора турбакка, көхтөөх кыттыыны ыларгытыгар ыҥырабыт!
Бэлэмнээтэ Анна СЛЕПЦОВА.