Бу ый 12 чыыһылатыгар Бүтүн Арассыыйатааҕы үөрэҕирии ааксыйатын чэрчитинэн, киһи аныгы үйэ тэтимигэр төһө бэлэмнээҕин көрдөрөр, цифровой билиитин хаҥатар «ИТ дьыктаан-2024» ыытыллаары турарын туһунан Арассыыйа сыыппара сайдыытыгар, сибээс уонна маассабай коммуникациялар министиэристибэлэрэ биллэрдэ.
Дьыктаан тэрийээччитинэн Тюмень уобалаһын информационнай Департамена буолар. Бу тэрээһин 2019 сылтан Арассыыйа бары бэйэ салайыныылаах бэйэмтэлэригэр тохтоло суох ыытыллар. Маҥнайгы дьыктаан 2018 сыллаахха Тюмень уобалаһыгар ыыттыллыбыта биллэр.
Билигин бу тэрээһиҥҥэ бүтүн дойдуттан сылын ахсын 120 тыһыынчаттан тахса киһи кыттыыны ылара бэлиэтэнэр. Муҥутуур чыпчаал көрдөрүү 2022 сыллаахха 230 тыһыынча киһини хабан үрдүк көрдөрүүлээх тэрээһин буолан ааспытын бигэргэппитэ.
ИТ дьыктаан 3 түһүмэххэ арахсан ыытыллар. Ол курдук, алын кылаас оҕолоругар (1 – 4 кылаастар) аналлаах, уопсай билиини көрдөрөр уонна быдан дириҥэтэн үөрэтэр дьоҥҥо аналлаах тестэр. Тест 32 ыйытыктаах буолар: көмпүүтэринэн сатаан туттууттан саҕалаан социальнай ситимҥэ дьоҕургун көрдөрөр ыйытыктарга тиийэ. Тэрээһин киһи аныгы үйэ хаамыытынан цифровой олоххо төһө бэлэмнээҕин, бэйэ үөрэҕи ылыныытын сыаналанарыгар, ону таһынан, уопсай билиитин-көрүүтүн хаҥатарыгар бигэ тирэх буолар.
Дьыктаан онлайн формат нөҥүө «ит-диктант.рф» ситимигэр ыытыллыаҕа.
Тэрээһин түмүгүнэн дойду уопсай көрдөрүүтэ, дьыктаан хаамыыта, төһө дьону хабан ыытыллыбыта ырыҥалаан ырытыллар. Ону таһынан, хас биирдии киһиэхэ тус көрдөрүүлээх туоһу суруктар бэриллиэхтэрэ.