Муус устар 14 күнүгэр Михаил Андреевич Алексеев аатынан Баппаҕаайы орто оскуолатын тэрээһининэн «Ийэ дойду патриоттара» улуустааҕы байыаннай-спортивнай күрэхтэһии буолан ааста. Оскуола профкомун «Мин — патриоппун» бырайыагынан күрэхтэһии үтүө үгэс быһыытынан быйыл үһүс төгүлүн ыытылынна. Бу тэрээһин 2021, 2022 сылларга оҕолорго анаан ыытыллыбыт эбит буоллаҕына, быйыл дойду таһымыгар биллэриллибит Педагог уонна уһуйааччы, Саха Республикатыгар Үлэ уонна Бүлүү улууһугар Доруобуйа сылын чэрчитинэн үөрэҕирии эйгэтин эдэр үлэһиттэригэр ананна.
Күрэхтэһиигэ Н.Г. Чернышевскай аатынан Бүлүүтээҕи профессиональнай-педагогическай колледжтан “Лидер” (хамаанда капитана Иннокентий Иннокентьевич Баснаев), Кыһыл-Сыыр орто оскуолатыттан “Пламя” (хамаанда капитана Семен Александрович Гаврильев), М.А. Алексеев аатынан Баппаҕаайы орто оскуолатыттан “Отвага” (хамаанда капитана Аян Анатольевич Антонов) 6-лыы киһилээх хамаандалара кыттыыны ыллылар. Уонна Баппаҕаайы оскуолатын “Молодая гвардия” эдэр байыастарын этэрээтэ (хамаанда капитана Николай Николаев, 11 кылаас үөрэнээччитэ) күрэҕи таһынан кыттан көх-нэм буоллулар.
Үгэһи тутуһан, үөрүүлээх арыллыы муусука учууталын Кириллина Матрена Егоровна тойугунан саҕаланна, сиэри-туому ситэрэн оскуола кыргыттара арыылаах алаадьынан кэлбит ыалдьыттары күндүлээтилэр. Нэһилиэк баһылыга Егор Афанасьевич Николаев, оскуола дириэктэрэ Виталий Владиславович Макаров күрэх кыттыылаахтарын эҕэрдэлээн, ситиһиини баҕаран тыл эттилэр. “Тэтим” үҥкүү ансаамбыла (сал. С.Ю. Аммосова) чороонноох үҥкүүнэн эҕэрдэлээтэ. Күрэхтэһии сүрүн тэрийээччитэ уонна судьуйата, физкультура учуутала Иванова Мария Константиновна түһүмэхтэри, куоталаһыы быраабылатын билиһиннэрдэ.
Бастакы түһүмэх, бэйэни билиһиннэрии, куоталаһыыттан туспа сыаналанна. Манна кыайыылаах Бүлүүтээҕи педколледж “Лидер” хамаандата “Бастыҥ визитка” номинациянан наҕараадаланна. Бу түһүмэххэ Кыһыл-Сыыр хамаандатыттан Иван Николаевич, Иванна Ивановна Тимофеевтар ылбаҕай ырыаларынан дьон сэҥээриитин ыллылар.
Иккис түһүмэххэ, сыал быраҕыытыгар (дартс), хамаандалар чилиэннэрэ бары кытыннылар. “Бэргэн ытааччы” номинацияны эр дьоҥҥо Соломонов Максим Николаевич Соломонов (Бүлүү, “Лидер” хамаанда), дьахталларга Уйгулаана Иннокентьевна Семенова (Бүлүү, “Лидер” хамаанда) ыллылар.
Үһүс түһүмэх, АК-74 автоматы ыһыы-хомуйуу, хамаанда капитаннарыгар анаан ыытылынна. Саамай түргэн көрдөрүүлээх Баппаҕаайы оскуолатыттан “Отвага” хамаанда капитана Аян Анатольевич Антонов кыайыылаах буолла. Бу түһүмэххэ Баппаҕаайы нэһилиэгин баһылыгын солбуйааччы, өр сылларга оскуола оҕолорун “Молодая гвардия” этэрээтин салайбыт Гаврил Иванович Алексеев судьуйалаата.
Төрдүс түһүмэх – “Снаряжение магазина АК патронами”. Бу көрүҥ кыайыылаахтарынан эр дьоҥҥо Максим Николаевич Соломонов (Бүлүү, “Лидер” хамаанда), дьахталларга Надежда Егоровна Степанова (Баппаҕаайы, “Отвага” хамаанда) буоллулар.
Мантан салгыы бэһис, алтыс, сэттис түһүмэхтэргэ хамаанда чилиэннэрэ бары кыттыылаах куоталаһыылара ыытылыннылар: суһал көмөнү оҥоруу, мас хайытыыта, сааһылааһына уонна көрдөөх эстафета. Мас хайытыытын, сааһылааһынын түмүгүнэн “Саамай түргэн, сымса” номинацияны Тимофеев Иван Николаевич (Кыһыл-Сыыр, “Пламя” хамаанда) ылла. Эстафета уолаттар кыргыттары, эр дьон дьахталлары салааскаҕа олордон сүүрүүлэриттэн саҕаланна, онтон мэһэйдэри туораан, хаарынан сыыллан тиийэн гранатанан сыал бырахтылар, “дулҕаларынан” сүүрэн кэлэн үстүү буолан туут хайыһарынан куоталаһыыны түмүктээтилэр.
Тыҥааһыннаах сытыы киирсии кэнниттэн уопсай түмүк таҕыста:
1 миэстэ – Н.Г. Чернышевскай аатынан Бүлүүтээҕи профессионально-педагогическай колледж “Лидер” хамаандата;
2 миэстэ – М.А. Алексеев аатынан Баппаҕаайы орто оскуолатын “Отвага” хамаандата;
3 миэстэ – Кыһыл-Сыыр орто оскуолатын “Пламя” хамаандата;
“Кыайыыга дьулуурун иһин” номинация — М.А. Алексеев аатынан Баппаҕаайы орто оскуолатын “Молодая гвардия” хамаандата.
Кыттааччылар бары грамотанан, мэдээлинэн, сыаналаах бириистэринэн, кыайыылаах хамаанда кубогынан наҕараадаланнылар. Уонна биирдиилээн бастыҥ кыттааччылар анал бириистэринэн бэлиэтэннилэр. Бүлүүтээҕи педколледж “Лидер” хамаандатын састаабыгар киирэн күрэхтэһэ кэлбит Бүлүү Боотура, хапсаҕайга республика хас да төгүллээх абсолютнай чемпиона Николай Николаевич Николаев спорду сэҥээрээччилэр болҕомтолорун ылла. Кыһыл-Сыыр орто оскуолатын үлэһиттэрэ, үс эдэр ыаллар, “Пламя” диэн хамаанда тэринэн кэлэн кыттыбыттара хайҕаллаах.
Күрэхтэһиини физкультура учуутала Мария Константиновна Иванова, оскуола директора Виталий Владиславович Макаров, педагог-организатор Марина Ивановна Афанасьева сыаналаатылар. Тэрээһин үөрүүлээх арыллыытын Баппаҕаайы оскуолатын учууталлара Ирина Николаевна Жиркова, Алина Семеновна Винокурова иилээн-саҕалаан ыыттылар, салгыы күрэх хаамыытын көрөөччүлэргэ Ирина Николаевна сырдатта. “Көмүс бөрүө” пресс-киин (сал. Тарасова Л.С.) эдэр кэрэспэдьиэннэрэ Арина Андреева, Нарыйаана Антонова, Наталья Антонова, Анастасия Степанова күрэхтэһии түгэннэрин хаартыскаҕа түһэрдилэр, кыттааччылары кытта кэпсэттилэр. “Мичээр” оҕо саадын үлэһиттэрэ итии чэйинэн, минньигэс аһынан күрэхтэһии кыттыылаахтарын көрүстүлэр. Д.С. Иванова, Ю.Н. Макарова бурдук аһын арааһын, миин, торуой, салаат атыылаатылар.
“Ийэ дойду патриоттара” улуустааҕы байыаннай-спортивнай күрэхтэһии олус сэргэхтик ыытылынна. Күрэхтэһиини сүүрэн-көтөн оскуола профкомун үлэһиттэрэ Иванова М.К., Андреева Д.Н., Афанасьева М.И.тэрийдилэр, оскуола учууталлара көмөлөстүлэр. Күрэҕи спонсордаатылар: “Баппаҕаайы нэһилиэгэ” муниципальнай тэриллии дьаһалтата, М.А. Алексеев аатынан оскуола коллектива, чааһынай урбаанньыттар Алексеев Николай Николаевич, Егорова Диана Николаевна, Яковлева Розалия Дмитриевна, Петрова Розалия Николаевна, оскуола педагог-организатора Афанасьева Марина Ивановна.
Күрэхтэһии бары кыттыылаахтарыгар, тэрийээччилэргэ, спонсордарга, күүс-көмө буолбут дьоҥҥо барҕа махтал. Ийэ дойдуга бэриниилээх буолууну, чөл олоҕу пропагандалыыр сыаллаах, үтүө кэскиллээх үлэ өссө да үксүү турдун.
Сардана Петровна Иванова, история учуутала,
М.А. Алексеев аатынан Баппаҕаайы оскуолата
Илбэҥэ, Бүлүү.