Хабаровскай куоракка
Быйыл 2025 сылга үктэнэн баран Бүлүү оҕо спортивнай оскуолатын иитиллээччилэрэ улахан күрэхтэһиилэргэ ситиһиилээхтик кыттан, сылбытын үчүгэйдик саҕалаатыбыт. Сүүрүүгэ Уһук Илин Федеральнай уокурукка бастыыр иһин күрэххэ 16-та 18-гар диэри саастаах кыргыттарга уонна уолаттарга Хабаровскай куоракка курэхтэһии буолан ааста. Уопсайа 9 хамаандаттан 315 спортсмен күөн көрүстүлэр. Сахабыт сирин хамаандатын чилиэннэрэ 38 мэтээли илдьэ кэллилэр. Ол курдук 11-кыһыл көмүс, 10-үрүҥ көмүс, 17-боруонса. Хамаанданан 16-гар дылы саастаахтарга 2-ис миэстэ буолары ситистилэр. Хамаанда бэрэстэбиитэллэрэ С.В. Гуляев уонна Н.Д. Сотникова. Бүлүүтээҕи оҕо спортивнай оскуолатыттан 4 оҕо кыттыыны ыллылар: Владислав Данилов, Марина Григорьева, Александр Васильев, Юрий Маслов. Үрдэлгэ таҕыстылар: үрүҥ көмүс мэдээлгэ- Владислав Данилов, 60 миэтирэҕэ мэһэйдээх сүүрүүгэ, 4х200м эстафетнай сүүрүүгэ — боруонса мэтээлгэ — Владислав Данилов уонна Александр Васильев.
Дьокуускай куоракка
Республикаҕа бастыыр иһин кыһыҥҥы сүүрүү күрэҕэр ситиһиилээхтик кытынныбыт. Курэххэ 16-тан- 18 дылы саастаахтаах кыргыттар, уолаттар күрэхтэстилэр. Уопсайа 9 хамаанда, 300-чэкэ спортсменнар кыттыылаах буолла.
18-гар диэри үрдэлгэ таҕыстылар:
Владислав Данилов — 1 миэстэ 60м барьердаах сүүрүүгэ.
Александр Васильев — 2 миэстэ 60м уонна 3 миэстэ 200м.
Святослав Софронов — 3 миэстэ ядро быраҕыытыгар.
Наина Ионова — 3 миэстэ 800м.
Ону таһынан үчүгэй көрдөрүүлээх сүүрдүлэр: Юра Маслов-200 м., Федор Саввинов-800 м.,
Диана Егорова, Марина Григорьева- 400 м. уонна 60 м. барьердаах сүүрүүгэ 4-үс миэстэ буоллулар.
Тюмень куоракка
Тохсунньу 28-30 күннэригэр Тюмень куоракка 18-гар диэри саастаах оҕолорго Россияҕа бастыыр иһин сүүрүү курэҕэ буолла. Барыта 60 дойду куораттарыттан 600 спортсмен кытта кэлбиттэр. Бүлүү улууһуттан Владислав Данилов баран ситиһиилээхтик кыттан кэллэ. 60 м. мэһэйдээх уонна 400 м. сүүрүүгэ бэйэтин бастыҥ түмүктэрин оҥордо. Тэрийээччилэргэ, судьуйаларга күрэхтэһиини үрдүк таһымҥа ыытыы иһин тренерин Туяра Ивановна Рожинаны кытта махтаналлар! Инникитин үрдүктэн үрдүк ситиһиилэри.
Наина Ионова, IX кылаас үөрэнээччитэ,
И.Л. Кондаков аатынан Бүлүүтээҕи гимназия