Ыллыыр кырылас кумахтаах, баай историялаах кырдьаҕас Бүлүү сирэ — уота «Кэскил» оҕо бэчээтин кыһатыгар ураты улуус буолар. Тоҕо диэтэххэ, оҕо суруналыыстыкатын, хамсааһынын төрүттээччилэриттэн биирдэстэрэ, саха суруналыыстыкатын чаҕылхай символа, «Кэскил», «Юность Севера» хаһыаттар Бочуоттаах эрэдээктэрэ, «Бочуот знага», «Норуоттар доҕордоһуулара» уордьаннар кавалердара, СӨ, РФ култууратын үтүөлээх үлэһитэ Нина Иннокентьевна Протопопова төрөөбүт дойдута буолар.
Н.И. Протопопова аатынан Бүлүү куоратын оҕо айар уонна дьоҕурун сайыннарар «Кэскил» киин иһинэн «ЭКОРепортер» сайыҥҥы оскуола үлэлээтэ. Сэттэ оҕо сырытта.
«Репортер» куруһуок 2013 сыллаахтан үлэлиир. Элбэх оҕо талаанын, сатабылын тобулан кынат кыырайан тахсыбыта, актыбыыс буолбута. Салайааччы — энтузиаст учуутал, «Оҕо саас ахтылҕана» кинигэ ааптара, «За вклад развитие дополнительного образования РС(Я)» бэлиэ хаһаайына Кыдана Владимировна Дорофеева. Кини кэпсиир: «Электроннай сурунааллаахпыт. Бу бырайыакпытынан былырыын АЛРОСА Гранын ылбыппыт. «ЭКОРепортер» диэн сайыҥҥы оскуола иккис сылын үлэлиир».
Бүлүү улууһуугар Н.Е.Мординов-Амма Аччыгыйа аатынан «Кэскил» оҕо бэчээтин кыһатын дириэктэрэ Ольга Семенова, корреспонденнар Эльдар Садовников, Петр Матвеев атырдьах ыйын 15-18 күннэригэр үлэлээн кэллилэр. Уоттуга, Чинэкэҕэ, Дьөккөҥҥө олохтоохтору кытта атах тэпсэн олорон кэпсэттилэр, сири-уоту көрдүлэр, ахтыы хомуйдулар. Бу күннэр устата эдкордар Юлианна Фомина, Айнура Фёдорова, Карина Иванова, Руслана Анисимова сырыттылар, бэйэлэригэр матырыйаал суруйдулар.
Ону таһынан, үлэһиттэр маастар-кылаас ыыттылар. 11 кылаас үөрэнээччитэ Руслана Анисимова: «Эльдар Андреевич интервью хайдах ыларга, ыстатыйаны сөпкө суруйарга, Петр Алексеевич видеоҕа устарга, хаартыскаҕа түһэрэргэ үөрэппиттэрэ. «Ыалдьыт» диэн рубрикаҕа Ольга Ивановнаны ыҥыран суруйбуппут. Олус үчүгэй кэпсэтии тахсыбыта. Манна Авеналия Антонова, Лиза Быканова, Анна-Нарыйа Федорова кыттыыны ылбыттара».
Бүлүү уонна «Кэскил» ситимнэрэ өссө да күүһүрэ туралларыгар баҕарабыт. «ЭКОРепортер» оҕолоругар, салайааччыга Кыдана Владимировнаҕа барҕа махталбытын тиэрдэбит!
Эльдар Садовников