Алтынньы 31 күнүгэр, уһун өрөбүллэр бириэмэтигэр ыытыллар тэрээһиннэр чэрчитинэн, Бүлүүтээҕи оскуола оҕотун наукаҕа, тиэхиньикэҕэ айар-тутар дьоҕурун сайыннарар кииҥҥэ педагогтарга уонна үөрэнээччилэргэ анаан маастар-кылаас буолан ааста.
![](https://keskil14.ru/wp-content/uploads/2023/11/tu-alaah-maastar-kylaas-1-1024x770.jpg)
Тэрээһиҥҥэ тэрилтэ бары педагогтара уонна 14 уол оҕо кыттыыны ылла. Маастар-кылааһы эбии үөрэхтээһин педагога Иван Алексеевич Яковлев ыытта. Тиэмэтэ: Билиҥҥи бириэмэҕэ олус наадалаах блиндажнай чүмэчини хайдах оҥоруохха сөбүн туһунан. Бу чүмэчи олох судургутук оҥоһуллар эбит. Кини атын чүмэчилэртэн сүрүн уратыта — хас да чааһы быһа умайыан сөп. Маннык чүмэчини анал байыаннай дьайыыга кыттааччылар тутталлар эбит, тоҕо диэтэр чүмэчи уһуннук умайарын ааһан, өссө тимир оһоххо оттук быһыытынан туттуохха сөп эбит. Чүмэчини оҥорорго биһиэхэ наада эбит: хортуонка,тимир бааҥка уонна парафин эбэтэр борустуой чүмэчи. Хортуонканы бааҥкаҕа үчүгэйдик эрийэн угабыт, онтон чүмэчибитин уулларабыт. Ууллубутун кэннэ бааҥкабытыгар кутабыт, уонна 2-3 чаас устата сойутабыт. Сойбутун кэннэ туттуохпутун сөп.
![](https://keskil14.ru/wp-content/uploads/2023/11/Tu-alaah-maastar-kylaas-2-1024x770.jpg)
Иван Алексеевич этэринэн маннык чүмэчини бултка илдьэ сылдьар эмиэ олус табыгастааах. Маастар кылаас түмүгүнэн 20 устуука чүмэчини оҥороннор анал байыаннай дьайыыга ыытыахтаах эбиттэр. Кэлин өссө тэрилтэ үрдүнэн бары маассабайдык оҥорорго былааннаналлар. Маастар кылаас наһаа туһалаах буолла, оҕолорго даҕаны, улахаттарга даҕаны.
Джулианна Дорофеева, «Репортер» медиакиин
Н.И. Протопопова аатынан «Кэскил» киин, Бүлүү к.