Үөһээ Бүлүүтээҕи 2-с нүөмэрдээх оскуолаҕа быйыл үбүлүөйдээх, ураты сыл. Билии күнүн бырааһынньыга 50 сыл анараа өттүгэр сибэкки дьөрбөтө тутуулаах киирбит кырачааннарга, ол эбэтэр выпускниктарга ананна.
Кылаас чаастарга ыалдьыттаан оскуолатааҕы кэрэ кэмнэрин ахтан аастылар, оҕолорго кэс тылларын анаатылар. Оскуола мусуойугар сылдьан оҕо кэминээҕи хаартыскаларын көрөн, оскуолатааҕы кэмнэрин санаатылар. Үөрүүлээх линейкаҕа выпускниктар ааттарыттан Анжелика Ариановна Борбуева оскуола директорыгар, Руфов Васмар Анастасиевичка, пионердыы рапорт туттаран баран тыл эппитэ олус долгутуулаах буолла.
Оскуолабыт арыллыаҕыттан өр кэмҥэ география учууталынан үлэлээбит 1997, 2009 сс. «Бастыҥ учуутала» анал аат хаһаайката, «СӨ үөрэҕэриитин туйгуна», педагогическай үлэ бэтэрээнэ Глафира Михайлованы 75 сылынан оскуола профкомун бэрэссэдээтэлэ Галина Тотонова эҕэрдэ тылын эттэ.
Быйыл оскуолабытыгар 24 оҕо саҥа оскуола боруогун атыллаата. Маҥнайгы учууталлара РФ үөрэҕин бочуоттаах үлэһитэ, наставнига, РС(Я) методиһа, СӨ үөрэҕин туйгуна Галина Сортолова батыһыннаран үөрүүлээх линейкаҕа киллэрдэ. Төрөппүттэр ааттарыттан Сайдаана Ким тыл эттэ.Үөрэнээччилэргэ оскуола коллективын, төрөппүттэр уонна олохтоох дьаһалта ааттарыттан эҕэрдэ тыллар этилиннилэр, бэлэхтэр туттарылыннылар.
Саҥа үөрэх дьылыгар саҥа аартыктар арылынныннар, билиигэ-көрүүгэ сирдээтиннэр, инникигэ ураты уларыйыыны аҕаллыннар. Үбүлүөйдээх үөрэх дьыла барыбытыгар ситиһиилээх буоллун!
«Сыккыс” пресс-киин,
Үөһээ Бүлүү