Бүлүү улууһун Аҕатын сүбэтэ 2017 сыллаахха уопсастыбаннай тэрээһин курдук бигэргэнэн үлэлээн саҕалаабыта. Бу уопсастыбаннай тэрээһин сүрүн үлэтинэн ыарахан балаһыанньаҕа түбэспит дьоҥҥо уонна дьиэ кэргэҥҥэ көмөнү тэрийээһин буолар.
Ол курдук быйыл Бүлүүтээҕи оҕо дьиэтин оҕолорун кытта Байанай ыйа саҕаланыыта сэтинньи ый бастакы күнүгэр Кулуһуннаах диэн Эбэҕэ илиминэн уонна муҥханнан түөрт оҕо, алта аҕа буолан балыктаабыттар. Уолаттар урут маннык булт ньымаларын билсэ иликтэр эбит, саха омук төрүт дьарыга муҥханы кытта билсэн, муус аннынан илимнээһин ньыматыгар үөрэнэн олус сөбүлээн кэлбиттэр. Дьиэлэригэр кэлэн баран бултаабыт соболорун буһартаран астына сиэбиттэр. Инникитин “Аҕа үөрэҕэ” бырайыак чэрчитинэн булт атын ньымаларын кытта билиһиннэрэргэ былааннаабыттар.
Үс оҕолоох ыал аҕатын Яков Петров быстах хомуурга балаҕан ыйын 21 күнүгэр ыҥырыллыбыта. Ол иһин Молодежнай кварталыгар саҥа туттан испит дьиэтин ситэрбэккэ хаалбыт. Дьиэ бүрүллүбэккэ хааллаҕына маһа буорту буолар. “Аҕа сүбэтэ” Яков аймахтарын, доҕотторун кытта дьиэ сарайын уонча күн иһигэр көмөлөөн оҥорбуттар.
Бу кэннэ “Аҕа ууһа” быстах хомуурга барбыт Яков Петров уонна Петр Иванов дьиэ кэргэттэрин кыстыыр муустарын хааччыйбыттар.
Юлианна ФОМИНА, «Репортер» медиакиин,
Н.И. Протопопова аатынан «Кэскил»
оҕо айар-тобулар дьоҕурун сайыннарар киин, Бүлүү к.