Олунньу 13 күнэ — Төрөөбүт төрүт тыл уонна сурук-бичик күнэ. Г.И. Чиряев аатынан Бүлүү 1-кы №-дээх оскуолатыгар сахалыы өбүгэ оонньууларыгар күрэхтэһии буолла. Кылаастан 5-11 дылы биирдии оҕо күөн көрүстүлэр. Уопсайа оскуола үрдүнэн 13 оҕо кытынна. Оҕолор бөлөҕүнэн арахсан, ойбонтон уулааһын, көтөх ынаҕы туруоруу уонна тутум эргиирэ көрүҥнэргэ күрэхтэстилэр.
Бу сахалыы оонньуулары Ирина Михайловна Аммосова, төрүт култуура учуутала, көҕүлээһининэн уонна физкультура учууталлара иилээн-саҕалаан ыыттылар.
Бу күрэх туһунан Ирина Михайловна бу курдук кэпсээтэ:
— Бу маннык өбүгэ оонньуутун биһиги оскуолабытыгар 2015 сылтан сылын аайы үгэс быһыытынан олунньу 13 күнүгэр, саха тылыгар анаммыт нэдиэлэҕэ, ыытабыт. Үүнэр көлүөнэ ыччаты, оскуола оҕотун эт-хаан сайдыытыгар оҕо чэгиэн-чэбдик, доруобай, таһаарыылаах үлэни кыайар, дойдутун харыстыырга бэлэм, өй-санаа, күүс-уох өттүнэн эргиччи сайдыылаах буола үүнэрин ситиһии, иитии сыаллаах-соруктаах үлэлиибит. Кылаас салайааччылара, үөрэнээччилэр бары бу тэрээһиҥҥэ көхтөөхтүк кытталлар, бириистээх миэстэҕэ кыттан сүрдээҕин үөрэллэр.
Бу күрэххэ тутум эргииригэр Аян Егоров, 7 “б” кылаас үөрэнээччитэ, саамай элбэхтик эргийдэ. Ойбонтон уулаһыҥҥа, үс куонуһу ылан, Дамир Мусин, 8 “в” кылаас үөрэнээччитэ, көтөх ынаҕы туруоруу күрэҕэр Максим Васильев, 10 “в” кылаас үөрэнээччилэрэ рекорд оҥордулар. Бу үс сахалыы көрүҥҥэ оҕо күүстээх- кыахтаах буоллаҕына, бу күрэхтэргэ кыайар-хотор. Инникитин ситиһиини баҕарабын.
Дамир Мусин, 11 кылаас үөрэнээччитэ:
— Күрэхтэһии тыҥааһыннаахтык барда. Кыттааччылар күүстээхтэр эбит. Кыайыыга эрэллээх этим. Инникитин элбэхтик ыытылларыгар баҕарабын.
Аян Егоров, 7 кылаас үөрэнээччитэ:
— Мин спордунан кыра эрдэхпиттэн дьарыктанабын. Бу күрэххэ тутум эргииригэр бэйэбэр рекорд оҥордум. Уопсай түмүккэ кыайыылааҕынан таҕыстым. Кыайыыга эрэллээх этим. Спордунан дьарыктаныҥ, күүстээх-кыахтаах буолуоххут.
Биир интириэһинэй түгэнинэн күрэххэ 2 кыыс кыттыыны ылбыта буолла: 5 кылаастан Амелия Алексеева уонна Даяна Алексеева, 7 кылаастан. Бөлөҕүнэн 1-2-3 миэстэ таҕыста. 5 кылаастар ортолоругар 1 миэстэни Амелия Алексеева, 6-7 кылаастарга 1 миэстэни Аян Егоров, 8-9 бөлөхтөргө 1 миэстэни Петя Павлов уонна 10-11 кылаастар ортолоругар 1 миэстэни оскуоланы быйыл бүтэрээччи Дамир Мусин кыайыылааҕынан таҕыстылар. Олус сэргэх тэрээһин буолан ааста.
Интервьюну ыллылар Юлиана Томская, Саина Алексеева, «Ориентир» медиакиин эдэр кэрэспэдьиэннэрэ, Г.И. Чиряев аатынан Бүлүү 1-кы оскуолата.