Алтынньы 7 күнүгэр «Малдьаҕар сиэннэрэ» 4 этэрээтэ 7-11 кылаас уолаттара Ампаардаах алааска уонна Чочуобуна диэн өбүгэлэрбит сирдэринэн сатыы хааман тахсан, айылҕаҕа сылдьыыга үөрэннибит.
Сарсыарда 09:00 чаастан оскуолаҕа мустаммыт айаммытыгар туруммуппут. Яковлев Н.Н, Константинов В.А, Павлова А.П., Григорьева С.А уонна Тимофеева Т.В. салайааччылар барсыбыттара. Улахан Аантан Ампаардаахха диэри 5 биэрэстэ ыраах этэ, биһиги уолаттар ким даҕаны сылайдым диэбэккэбит үөрэ-көтө, кэпсэтэ-кэпсэтэ сатыы хааман тиийбиппит. «Саха Боотур» базатыгар биһигини Андрей Юльевич Артамонов көрсүбүтэ.
Суумкаларбытын ууран баран, алаадьыларбытын ылан, Чочуобунаҕа айаммытын салҕаабыппыт. Андрей Юльевич аты миинэн айаннаппыта. Барыбытыгар ат сэбин-сэбиргэлин, хайдах аты миинэри, хайдах сыһыаннаһыахтаахпыт туһунан сиһилии кэпсээбитэ. Бары аты миинэн көрбүппүт, мин олуһун астыммытым. Былыргы өбүгэлэрбит аартыктарынан Өлүөнэ эбэбитигэр тахсыбыппыт. Эбэбитин алгыстаах алаадьынан күндүлээбиппит. Бу сылдьан элбэх хаартыскаҕа түспүппүт.
Ол кэннэ Чочуобунаҕа туруору хайаны дабайан тахсаммыт, кутаа уот оттоммут, уоппутун саламааттаах алаадьынан күндүлээбиппит. Ол кэнниттэн Андрей Юльевич уонна Богдан Слепцов толорууларыгар оһуохайдаабыппыт. Салгыы Ампаардаах алааска төннөн, үүтээҥҥэ киирэн, остуол тардынан, тото-хана аһаабыппыт. Оскуола аһынан хааччыйбыта. Андрей Юльевич тимири уулларыы уонна уһаныы туһунан кэпсээбитэ. Мастан оҥорбут тренажердары көрдөрбүтэ. Уолаттар бары болҕойон истибиппит, элбэх ыйытыыны биэрбиппит. Чэйдээн баран, бары Андрей Юльевичка махтаммыппыт уонна үөрэ-көтө илии тутуһан баран, Улахан Ааҥҥа төннүбүппүт.
Бу күн кэнниттэн мин маннык түмүккэ кэллим. Өбүгэлэрбит олорбут олохторун үөрэтэр олус үчүгэй эбит. Маннык тэрээһиннэри элбэхтик ыытыахха наада дии саныыбын. Уонна Андрей Юльевич Артамоновка уонна салайааччыларбар маннык тэрээһини тэрийбиттэригэр, интэриэспитин тардыбыттарыгар улаханнык махтанабын.
Аман Еремеев, М.Е.Васильева аатынан 2 Малдьаҕар орто оскуолатын 10 кылааһын үөрэнээччитэ, «УОТ» медиакиин. Григорьева С.А. хаартыскаҕа түһэриилэрэ