Норуот талаана Сергей Зверев-Кыыл Уола төрөөбүтэ 125 сылыгар
Бу көрөр видеороликкыт атыттартан туох эрэ уратылаах буоллун диэн толкуйдаатыбыт. Ол курдук, саҕаланыытыгар урукку уонна билиҥҥи кэми ситимнээн, өбүгэ үгэһэ тыыннаах буоллун диэн кыһанныбыт. Өбүгэ саҕаттан диэн толкуйдаан Дьөһөгөйү уонна аттаах киһини киллэрдибит.
Роликпытыгар төрөппүттэр, эбээлэр, эһээлэр, хос эбээ кыттыбыттара. Түмсүүлээхпитин көрдөрөн төһө кыалларынан элбэх буолан түмсүбүппүт.
Манна биһиги саха фольклорун барытын көрдөрөөрү Сергей Зверев-Кыыл Уола 125 сыллаах үбүлүөйүнэн Зверев айымньыларын оҕолорбутугар дьиҥ сахалыы тылынан суруллубут хоһооннорун булан киллэрдибит. Ону таһынан Улуу Кыайыы 80 сылынан уонна Саха сиригэр Аҕа дойдуну көмүскээччилэр сылларыгар анаатыбыт.
Оҕолорбутугар, кэнчээри ыччаттарбытыгар холобур буоларбыт быһыытынан, көлүөнэттэн-көлүөнэҕэ Ийэ тылбыт, сурукпут-бичикпит, фольклорбут бэриллэн иһиэхтээх диэн сырдык санааттан маннык олус үчүгэй тэрээһиҥҥэ дьүһүйүү-видеоролигы уһуллубут.
Төрөппүттэр ким тугу сатыырынан кыттыыны ылбыттара, ийэлэрбит бары хомустууллар эбит, бары да талааннарын көрөн сөхтүбүт. Ким да туора турбакка, оҕолорбут тустарыгар бары кыһаллан кытыннылар. Ийэлэрбит хомустаабыттара, сорохтор ыллаабыттара. Ариналаах Лилиана эбээлэрэ Надежда Николаевна хаһан да туойбатах киһи туойбута. Игорь эһээтэ Юрий Наумович оһуохай тылын эппитэ. Сценарийы уонна оһуохай тылын суруйбут ийэбит Лилия Васильевна оһуохайы таһаарбыта. Аҕалар эмиэ олус көхтөөхтүк кыттыбыттара, камера иннигэр кыбыстыбакка аныгы ыччакка алгыстарын бэркэ тириэртилэр. Каадырга көстүбэккэ хаалбыт төрөппүттэр, ис санааларыттан бары түмсэн көмөлөстүлэр. Сорохтор инструмент буллулар, ситии, сахалыы аһы астаан аҕалбыттара, бу туруоруу алгыс быһыытынан барбыта. Саха аһа барыта дэлэгэй этэ.
Баҕа санаабыт диэн, маннык хабааһыннаах күрэхтэргэ туруору устуу барсыбат эбит дии санаатыбыт.
Күрэххэ кыайыыбытыттан олус үөрдүбүт, долгуйдубут. Кэлэр кэнчээрибит, оҕолорбут тустарыгар өссө күүскэ түмсүүлээх буолуохпут дэстибит.
Билиҥҥи үйэҕэ куйаар ситимэ баара наһаа үчүгэй, бириэмэ ыгым буолан куйаар ситиминэн кэпсэтэн, бары санаабытын, идиэйэлэрбитин холбооммут, балаҕаҥҥа түмсэн, кыратык бэлэмнэнэн баран устубуппут. Олус үчүгэй эйгэлээх буолан табыллан хаалбыта. Бу устуубутугар күүс-көмө буолбут учууталбытыгар Венера Илларионовна Илларионоваҕа, дьоммутугар, аймахтарбытыгар улахан махтал. Сунтаар улууһун Кутана нэһилиэгин библиотекатыгар Сергей Зверев айымньыларыттан матырыйаал ыыппыттарыгар махтанабыт. Дьөһөгөйбүтүн Уус-Алдан Чэриктэй нэһилиэгиттэн аймахтарбыт сөбүлэһэн айаннатан аҕалбыттарыгар махтал.
Онтон хос эбээ кыра хос-хос сиэнин кытта кэлбиттэрэ ураты көстүү буолла.
Ньургуйаана Илларионова, 6-б кылаас төрөппүтүн бэрэсcэдээтэлэ.
А.Г. уонна Н.К. Чирээйэптэр ааттарынан Дьокуускай куорат национальнай гимназията.
keskil14.ru