Күндэйэ орто оскуолатын 20-чэ сыл эҥкилэ суох салайбыт, Саха Өрөспүүбүлүкэтин үөрэҕириитин үтүөлээх үлэһитэ, Арассыыйа Федерациятын үөрэҕириитин бочуоттаах үлэһитэ, «Гражданскай килбиэн» бэлиэ, «Сунтаар улууһун үөрэҕириитин сайдыытыгар кылаатын иһин» бэлиэ, «Методист Якутии» бэлиэ хаһаайкалара дириэктэрбит Иванова Маргарита Николаевна бочуоттаах сынньалаҥҥа тахсан, быйылгы 2023-2024 сыл үөрэх дьылыгар биһиэхэ саҥа салайааччы Федоров Вячеслав Васильевич ананан үлэлии сылдьар. Киниттэн интервью биэрэригэр көрдөстүбүт.
– Бэйэҕит тускутунан билиһиннэриҥ.
– Мин Фёдоров Вячеслав Васильевич Борис Никифорович Егоров аатынан Күндэйэ агротехнологическай хайысхалаах ЮНЕСКО ситимин орто уопсай үөрэхтээһин оскуолатын дириэктэрэ буолабын.
– Оскуоланы салайарга эн санааҕар, саамай туох сүрүн ирдэбил туох баарый?
– Салайааччы диэн, мин санаабар, бастатан туран эппиэтинэстээх, дьону кытта сатаан үлэлиир, үлэни сөпкө аттаран салайар, буола турары сөпкө анализтаан инники үлэни былаанныыр. Туруоруммут сыалын ситиһэр, дьоҥҥо холобур буолар киһи.
– Үөрэх хаачыстыбатын хайдах сыаналыыгын?
– Биһиги оскуолабытыгар үрдүк таһымнаах педагогическай состав үлэлиир. Балысханнаахтык сайда турар бириэмэҕэ хас биирдии оҕо оскуола биэрэр эрэ билиитинэн муҥурдаммакка, тус бэйэтэ эбии билэрэ-көрөрө элбэх. Ол иһин билиҥҥи кэм тыа сирин үөрэнээччитэ, мин санаабар, билиитин таһыма куорат оҕотуттан туох да уратыта суох. Онон биһиги оскуолабытыгар үөрэх хаачыстыбатын таһымын үчүгэй диэн сыаналыыбын.
– Нэһилиэк сайдыытыгар оскуола оруолун туһунан санааҕын үллэстиэҥ дуо?
– Биһиги нэһилиэкпитигэр «Нэһилиэгинэн бүттүүн оҕо иитиитигэр» диэн программа үлэлээбитэ ыраатта. Бүгүн бу үтүө холобуру өрөспүүбүлүкэ элбэх оскуолалара, нэһилиэктэрэ ылынан үлэлии олороллор. Бүгүҥҥү оскуола үөрэнээччитэ – сарсын нэһилиэк олохтооҕо. Онон, мин санаабар, оскуола нэһилиэк сайдыытыгар улахан оруолу ылар. Холобур, уруокка ылбыт билиитэ, сатабыла, дьону кытта алтыһара, араас таһымнаах тэрээһиннэргэ кыттан төрөөбүт дойдутун ааттатара, аҕа саастаах дьоҥҥо ытыктабыллаахтык сыһыаннаһара, бу барыта төрөөбүт дойдутугар таптала буолар. Онно оскуола сүрүн оруолу ылар.
– Кэпсэтииҥ иһин махтал! Үлэҕитигэр үрдүктэн үрдүк ситиһиилэри баҕарабыт!
Карнелия Исагалиева,
Б.Н. Егоров аатынан Күндэйэ орто оскуолатын 9 кылаас үөрэнээччитэ,
Күндэйэ, Сунтаар улууһа