Бүгүн, ахсынньы 26 күнүгэр, Дьокуускай куоракка Ил Дархан үгэс буолбут Саҥа дьыллааҕы харыйата Саха циркэтигэр буолар. Тэрээһиҥҥэ үөрэх туйгуннара, актыбыыстар, наукаҕа ситиһиилээхтэр ыҥырыллыбыттар.
Хас биирдии оройуонтан кэлбит үөрэнээччилэр билигин «Сосновый бор» оҕо сынньанар уонна чэбдигирэр киинигэр бааллар, кинилэргэ анаан күннэтэ араас хайысхалаах тэрээһиннэр, көрсүһүүлэр ыытыллаллар.
Холобур, бэҕэһээ оҕолору кытары Н.Е.Мординов-Амма Аччыгыйа аатынан «Кэскил» оҕо бэчээтин кыһатын айар-тутар үлэһиттэрэ, суруналыыстара көрсөн маастар-кылаас ыыттылар.
Бүгүн бырааһынньыктааҕы тэрээһиҥҥэ Ил Дархан Айсен Николаевы кытары эдэр кэрэспэдьиэннэр көрсөн кэпсэтиэхтэрэ, интервью ылыахтара. Ону сиһилии биһиги «Кэскил Медиа продакшн» Yotube каналбытыгар таҕыстаҕына көрөөрүҥ.
Сыл аайы Ил Дархан харыйатыгар Саха сирин бары улуустарыттан 700 кэриҥэ оҕо ыҥырыллар. Кинилэр бары биир кэмнээх бириэмийэнэн наҕараадаланаллар.
keskil14.ru