“Дюймовочка”, “Огниво”, “Оле-Лукойе”, “Русалочка”, “Гадкий утенок”, “Принцесса на горошине”, “Снежная королева” остуоруйалары аахпыккыт буолуо. Бу остуоруйалары барытын ким суруйбутай? Ганс Христиан Андерсен. Дания улуу суруйааччыта.
Бүгүн кини төрөөбүтэ 214 сылын туолла. Төһө да сүүһүнэн сыллар ааспыттарын иһин, кинини дьон-сэргэ умнубат. Тоҕо диэтэххэ, ол ыраах кэмтэн ыла аан дойду барыта кини суруйбут 162 остуоруйатын ааҕан улаатар.
Андерсен остуоруйалара оҕону үчүгэйтэн куһаҕаны араарарга, дьону, дойдуну, олоҕу таптыырга, сүрэхтээх, аһыныгас санаалаах, көрсүө сэмэй, бэрээдэктээх, эйэҕэс буоларга уһуйаллар.
1967 сыллаахха Оҕо литературатын норуоттар икки ардыларынааҕы коммерческайа суох тэрилтэтэ Ганс Христиан Андерсен төрөөбүт күнүн, муус устар 2 күнүн, Оҕо кинигэтин аан дойдутааҕы күнүнэн биллэрбитэ.
Онтон ыла бу күн араас судаарыстыбаларга оҕоҕо аналлаах элбэх тэрээһини библиотекалар, издательстволар тэрийэн ыытар үгэстээхтэр. Холобура, “Бичик” кинигэ кыһата бүгүҥҥүттэн “Үтүө санаа долбуура” диэн аахсыйаны саҕалаата. Фирменнэй маҕаһыыннарыгар тиийэн, оҕоҕо аналлаах ааҕан бүтэрбит кинигэлэргитин туттарыаххытын сөп. Ону кинилэр хомуйан ылан, мөлтөхтүк саҥарар оҕолор өрөспүүбүлүкэтээҕи интэринээт-оскуолаларыгар биэриэхтэрэ. Бу аахсыйа муус устар 14 күнүгэр диэри буолар.
Маны таһынан бүгүҥҥүттэн ыла ыам ыйын 15 күнүгэр диэри “Ребенок с детской книгой “Бичик” диэн хаартыска күрэҕин биллэрэр. Хаартыскаларгытын bichic_reklama@mail.ru электроннай аадырыска ыытаҕыт. Хайаан да “Необычный ракурс” диэн суруйан бэлиэтиигит. Түмүк Оҕо көмүскэлин күнүгэр тахсыа.
Оттон бүгүн “Бичик” маҕаһыыннарыгар тиийэн, 1000 солк. суумаҕа оҕо кинигэтин атыыластаххытына, сүүйүүлээх лотереяҕа оонньуугут, 3 кинигэни 2 кинигэ сыанатыгар ылаҕыт, бэлэх тутаҕыт. Ону сэргэ бүгүн күнүс 15.00 чаастан Дьокуускай Курашов аатынан уулуссатын 24 дьиэтигэр баар “Бичик” маҕаһыыныгар түргэнник ааҕыыга оҕолорго күрэх буолар.
Онон Оҕо кинигэтин аан дойдутааҕы күнүн билиигэ сирдиир кинигэ аргыстаах атаарыҥ!