Н.Е.Мординов-Амма Аччыгыйын аатынан Харбалаахтааҕы үөрэхтээһин холбоһугар «Тиһэх чуораан» чугдаарда.
Бастаан алын сүһүөх кылааһы бүтэрээччилэри чиэстээтибит, онтон ортоку сүһүөҕү түмүктүүр тохсустарга эксээмэннэригэр ситиһиилээх буоларга баҕа санаа этилиннэ. Онтон быйыл бүтэрэр сэттэ выпускниктарбытыгар алгыс тылын бастыҥа ананна, үчүгэй үөрэхтэрин, нэһилиэк олоҕор көхтөөх кыттыыларын бэлиэтээн,араас тэрилтэ кэлэктииптэрэ хайҕал суруктары, бэлэхтэри туттардылар.
Бүгүҥҥү үөрүүбүтүн 50 сыллаахха бүтэрбит выпустар кэлэн, эҕэрдэлээн өссө үрдэттилэр. Кинилэр оскуоланы бүтэрээччилэр сквердэрин оҥоруҥ диэн бэртээхэй ыскамыайканы бэлэхтээтилэр уонна бииргэ үөрэммит дьүөгэлэрин кэриэстээн, сиэнигэр быйыл бүтэрэр Максим Ксенофонтовка харчынан стипендияларын туттардылар. Аҕам саастаах дьоммутугар улахан махталбытын тиэрдэбит, этэҥҥэ эрэ буолуҥ диэн алгыыбыт!
Оттон оҕолорбутугар бүгүн этиллибит үтүө санаалар куруук араҥаччы буола сырыттыннар, эксээмэннэрин ситиһиилээхтик туттардыннар диэн баҕа санаабытын тиэрдэбит!
Валентина Семеновна Кривошапкина