Бүгүн, муус устар 10 күнүгэр биһиги Эдьигээммит Булуҥ улууһуттан «Азия оҕолоро» VIII Аан дойдутааҕы спортивнай оонньууларын уотун эстафетатын тутта.
https://vk.com/wall-199463452_18822
Оонньуулар уоттарын аэропортан саҕалаан, Туруук Мас сиригэр, Эдьигээн нэһилиэгин стадионугар диэри улууспут биллэр-көстөр 10 бастыҥ спортсмена арыаллаан аҕаллылар.
Ол курдук эстафета уотун тутар үрдүк чиэс Эдьигээн спортсменнарыгар Иван Иванович Ксенофонтовка, Алексей Алексеевич Шадриҥҥа, Богдан Олегович Портнягиҥҥа, Александр Андреевич Кимҥэ, Прокопий Олегович Николаевка, Александр Сергеевич Рассадиҥҥа, Василий Васильевич Беленковка, Саргылана Афанасьевна Яковлеваҕа уонна Николай Иванович Антоновка тигистэ.
Эстафета уота Эдьигээн устун айанныырын тухары нэһилиэк олохтоохторо, оҕолор, ыччаттар «тыыннаах» көрүдүөр буолан турдулар, үөрэ-көтө уруйдуу көрүстүлэр.
Стадиоҥҥа оонньуулар уоттарын улуус баһылыга Василий Николаевич Сорокин көрүстэ, үрдүк сыанаҕа таһаарда, олохтоохторго эҕэрдэтин эттэ.
Быйылгы «Азия оҕолоро» Саха сиригэр ыытыллара ураты суолталаах. Ол курдук быйыл биһиги биир дойдулаахпыт, сахалартан бастакы Олимпийскай чемпион Роман Михайлович Дмитриев төрөөбүтэ 75 сыла. Бу бэлиэ сыл «Азия оҕолоругар» биһиги Эдьигээммититтэн Саха сирин чиэһин көмүскүүргэ билиҥҥиттэ икки оҕобут баар. Ол курдук Артур Портнягин волейболга, Александра Филиппова тустууга Саха сирин сүүмэрдэммит хамаандатыгар киирэр кыахтаахтар.
Бу күн Эдьигээн оҕолоро һээдьэ үҥкүүлээн үөрүүлээх түгэни өссө киэргэттилэр. Уоту көрсүү кэнниттэн стадиоҥҥа эр дьоҥҥо маамыкта быраҕыытын күрэхтэһиитэ буолла.
Алёна, Алина АНТОНОВАЛАР, Х кылаас
Видео ааптара Дима АПОЛЛОНОВ, XI кылаас
Эдьигээн орто оскуолатын пресс-киинин юнкордара