Кулун тутар 26 күнүгэр Күөх Ньурба сиригэр-уотугар, олохтоохторугар умнуллубат, үөрүүлээх күн тосхойдо! «Азия оҕолоро» 8-с норуоттар икки ардыларынааҕы спортивнай оонньууларын уота Ньурба куоратыгар кэллэ!
Үөрүүлээх тэрээһиҥҥэ Ньурба олохтоохторо, оҕолор, аҕам саастаах да дьон, бары муһуннулар. Сахабыт сиригэр төрүттэммит «Азия оҕолоро» ооннуулары ыытар туһунан аан маҥнай бастакы Президеммыт Михаил Ефимович Николаев сорук туруорбута. Ол курдук, бу дьыл кулун тутар 19 күнүттэн Бастакы Президеммит төрөөбүт улууһуттан — Хаҥаластан VIII “Азия оҕолоро» оонньуулар уоттара саҕыллыбыта. Күн бүгүн факел Ньурбаттан Сунтаар улууһугар айаннаата.
Максим Прокопьев, VIII “Азия оҕолоро» оонньуу уотун эстафетатын салайааччыта:
— «Азия оҕолоро» оонньуу сүрдээх дириҥ суолталаах. Биһиги Бастакы Президеммыт Михаил Ефимович Николаев бу оонньуулары төрүттээбит идейнай вдохновителэ буолар, кини 1996 сыллаахха маҥнайгы «Азия оҕолорун» оонньуутун ыыппыта. Онно кыттыбыт спортсменнар билигин үрдүк Олимпиада чыпчаалыгар тиийэ кынаттанан ситиһиилэрин көрдөрөллөр. Бу оонньуулар кэлэр көлүөнэҕэ улахан спортка инникитин киирэллэригэр тиһэх буолаллар. Ньурба оройуонун олохтоохторо тэрээһини долгуйа күүппүттэр. Төһө да кутурҕан түгэннэр буолан ааспыттарын иһин, ньурбалар сүрдээҕин бэлэмнэммиттэр, дьон-сэргэ төһө да тымныытын, тыаллааҕын иһин, тахсаннар бэйэлэрин факелы көтөҕөөччүлэрин үөрэ-көтө көрүстүлэр. Түмүгэр көхтөөх оһуохай буолан ааста, ити биир ураты буолар, атын улуустарга оһуохай өссө тэриллэ илик этэ, инникитин да баар буолуоҕа. Ньурбалар «маладьыастар» диэхпитин баҕарабыт!
Валерия Гаврильевна Владимирова, улуустааҕы ыччат дьыалатын имиджевай политика управлениетын салайааччыта:
— Ньурба оройуонуттан биһиги саамай киэн туттар киһибит «Азия оҕолоруттан» кынаттанан, онтон ситиһиилэнэн бүтүн Олимпиада мэтээлин Саха сиригэр аҕалбыт Георгий Русланович Балакшин буолар. Оҕо бары билиэхтээх, биһиги киэн туттуохтаахпыт. Кинини холобур оҥостон, сыал туруорунан, кэлэр кэнчээри ыччаппыт Олимпиадаҕа тиийиэҕэ диэн эрэнэбин.
Ити курдук Ньурба оройуонугар VIII төгүлүн ыытыллар «Азия оҕолоро» оонньууларын историческай түгэнэ-уот кэлиитэ үөрүүлээхтик ааста. «Азия оҕолоругар» көрсүөхпүт!
Ньурбаҕа буолан ааспыт «Азия оҕолоро» спортивнай оонньуулар эстафетата хайдах ааспытын биһиги Телеграм-каналбытыгар көрүҥ: https://telesco.pe/keskil_media2020/10094
Анжелина ЖДАНОВА, XI кылаас.
«Ыллык» эдкорпост.
Ньурба, Хаҥалас.
Рустам Кириллин хаартыскалара.