Бэҕэһээ Өрөспүүбүлүкэ күнүгэр Өлүөхүмэ сиригэр-уотугар «Азия оҕолоро» норуоттар икки ардыларынааҕы VIII спортивнай оонньуу уотун эстафетата кэлбитэ. Өлүөхүмэ куоратын дьоно-сэргэтэ үөрүүлээх быһыыга-майгыга спорт бырааһынньыгын тэрийбитэ. Бүгүн эстафетаны Солянка сэлиэнньэтиттэн саҕалаан, нэһилиэктэр олохтоохторо көрүстүлэр.
Эстафетаны Абаҕа нэһилиэгин баһылыга А.М.Корнилов ыаллыы Кээччи нэһилиэгин баһылыгын Р.О.Федотова илиититтэн тутан, Абаҕа орто оскуолатыгар аҕалла. Уоту оскуола бастыҥ спортсменнара Кэскил Егоров уонна Анатолий Маркин арыаллаан аҕаллылар.
Александр Миронович мустубут дьону бу үөрүүлээх түгэнинэн эҕэрдэлээн тыл эттэ.
А.Г.Кудрин-Абаҕыыныскай аатынан Абаҕа орто оскуолатын дириэктэрэ, Өлүөхүмэ оройуонун депутата У.Н.Никитина оҕо спордун сайдыытыгар улахан үтүөлэрин бэлиэтээн туран, Өлүөхүмэтээҕи оҕо спортивнай оскуолатын хайыһарынан сүүрүүгэ тренеригэр, РФ үөрэҕириитин Бочуоттаах үлэһитигэр В.Р.Николаевка. көҥүл тустууга тренеригэр, Саха Өрөспүүбүлүкэтин үөрэҕириитин туйгунугар А.А.Уйгуровка, Абаҕа орто оскуолатын физкультураҕа учууталыгар П.И. Аржаковаҕа, спорт бэтэрээнигэр, РФ үөрэҕириитин Бочуоттаах үлэһитигэр, «Гражданскай килбиэн» бэлиэлээх З.И.Шумиловаҕа оройуон салалтатын аатыттан өйдөбүнньүк кинигэлэри туттартаата.
Үөрүүлээх түгэҥҥэ мустубут дьону-сэргэни Абаҕа орто оскуолатын У.Н.Лазарева салайааччылаах III кылааһын үөрэнээччилэрэ «Россия» спортивнай үҥкүүнэн эҕэрдэлээтилэр.
Үөрүүлээх түмсүү хаартыскаҕа түһүүнэн түмүктэннэ.
«Азия оҕолоро» оонньуу уота Өлүөхүмэ оройуонун нэһилиэктэринэн салгыы айанныыр.
Сааскылаана Уйгурова, IX кылаас, Айхал Николаев, IX кылаас
Леня Захаров, IX кылаас,
Эрчим Егоров, VII кылаас, Кэскил Егоров, XI кылаас
А.Г.Кудрин-Абаҕыыныскай аатынан Абаҕа орто оскуолата,
Өлүөхүмэ оройуона