«Азия оҕолоро» норуоттар икки ардыларынааҕы VIII оонньуулар буолаллара күнтэн күн чугаһаан иһэллэр. Оонньуулар уоттарын эстафетата бэс ыйын 10 күнүгэр Аммаҕа кэлэрин күүтэбит. Манан сибээстээн, ааспыт оонньуулар туһунан, “Азия оҕолоро” дойдубун кытта туох сибээстээҕин ырытан, анааран көрдүм.
Олимпийскай оонньуулар төрүттэммиттэрэ 100 сылыгар Дьокуускай куоракка “Азия оҕолоро” норуоттар икки ардыларынааҕы I спортивнай оонньууларын уота “Туймаада” стадиоҥҥа умайбыта. Ити 1996 сыллаахха этэ.
Саха өрөспүүбүлүкэтин бастакы Президенэ Михаил Ефимович Николаев көҕүлээһининэн Азия континенын оҕолоругар аан бастаан ыытыллар оонньууларга анаан Дьокуускайга “Туймаада” стадион, “Кыайыы 50 сыла” спорт дыбарыаһа, “Эллэй Боотур” муус дыбарыаһа, норуоттар икки ардыларынааҕы “Туймаада” аэропорт тутуллубуттара. Спорт 8 көрүҥүн түмпүт континент оҕолорун күрэхтэһиитигэр Кытайтан, Таиландтан, Монголияттан, Кореяттан, Кыргызстантан, Казахстантан, Бурятияттан, Тываттан, Агино-Бурятскай автономнай уокуруктан уонна Саха сириттэн барыта 259 спортсмен кыттыбыта.
Ханнык баҕарар оонньуу логотибынан биллэр
“Азия оҕолорун» бастакы оонньууларын бэлиэтэ маннык этэ:
2004, 2008, 2012 сылларга маннык бэлиэлээх эбит. Сыллара эрэ уларыйбыт.
2016 сыл
2024 сыл. Бу «Азия оҕолоро» норуоттар икки ардыларынааҕы VIII оонньууларын бэлиэтэ.
Сомоҕолоhуу, ѳрѳ кѳтѳҕүллүү бэлиэтэ буолуоҕа диэн тэрийээччилэр эрэнэллэр.
«АЗИЯ ОҔОЛОРО» УОННА МИН ДОЙДУМ
Биһиги Эмиспит сирэ оонньуу уотун эстафетатын икки төгүл үөрүүлээхтик көрсөн турар. Ити 2000 уонна 2008 сыллар. Ону туоһулуур хаартыскалары буллум.
ЧӨЛ ОЛОХТООХ НЭҺИЛИЭКПИТ
Эмис нэһилиэгэ Амма улууһугар спорду өрө тутар нэһилиэктэриттэн биирдэстэрэ буолар. Уһуйааҥҥа, оскуолаҕа, нэһилиэккэ үгүс спартакиадалар, түөлбэнэн күрэхтэр тиһигин быспакка ыытыллаллар.
Нэһилиэк спортинструктора Нонна Николаевна Ноговицына, физкультура учууталлара Мария Васильевна Неустроева, Анастасия Степановна Степанова, көҥүл тустуу тренера Аркадий Николаевич Тастыгин, “Чыпчаал” спортивнай кулууп салайааччыта Александр Александрович Ларионов, дуобат тренерэ Алексей Ильич Гаврильев оҕону, ыччаты кытта күүскэ үлэлииллэр.
Мин кинилэри олус убаастыыбын уонна бэйэм эмиэ чөл олоҕу тутуһарбыттан, спортка сыстан олоҕум быстыспат тиһигэ, ситимэ буолуо дии саныыбын.
Быйыл Амма улууһун оскуолаларын үөрэнээччилэрин спартакиадатыгар биһиги оскуолабыт бастакы миэстэ буолла. Манна мин эмиэ кыттыыны ылан сэмэй кылааппын киллэрбиппиттэн үөрэбин.
“Азия оҕолоро” быйыл Саха сиригэр ыытыллара олус үчүгэй. Улаатан бараммыт “Азия оҕолоро” биһиги оҕо сааспыт биир чаҕылхай өйдөбүлэ этэ диэн киэн тутта кэпсиэхпит.
Алёна ГАВРИЛЬЕВА, VII кылаас,
В.М. Новиков-Күннүк Уурастыырап аатынан Эмис орто оскуолата, Амма