Бу күннэргэ Дьокуускайга Азиатскай-Тихоокеанскай эдэр чинчийээччилэр конференциялара буола турар. Бу тэрээһин ахсыс төгүлүн ыытыллар. Ол иннинэнээҕи конференциялар Индонезияҕа, Тайваньҥа, Малайзияҕа, Индияҕа, Непалга уонна Индияҕа буолан ааспыттара. Быйыл манна 11 дойдуттан сүүстэн тахса киһи кытта кэллэ.
Туймаада хочотугар наука эйгэтигэр Аан дойду ааттаахтара тоҕуоруһа муһуннулар. Кытайтан, АХШтан, Малайзияттан, Непалтан, Индонезияттан, Сингапуртан, Индияттан, Словенияттан, Таиландтан, Филиппиныттан уонна Гуамтан эдэр чинчийээччилэри кытта Саха сирин оҕолоро оҥорбут бырайыактарын биир былаһааккаҕа көмүскүөхтэрэ. Бастыҥнар Аан дойду бастыҥ үөрэх кыһаларыгар үөрэнэр чиэскэ тиксиэхтэрэ.
Бүгүн конференция үөрүүлээх арыллыытыгар Саха сирин үөрэҕириитин министра Владимир Егоров, СР Оҕо дьоҕус академиятын ректора Василий Павлов уонна Азиатскай-физическай олимпиада президента Леонг Чуак Квек кыттааччыларга эҕэрдэ тылларын эттилэр.
Өрөспүүбүлүкэтээҕи лицей үөрэнээччилэрэ бэйэлэрэ туруорбут испиктээктэрин кыттааччыларга бэлэх ууннулар. Көрөөччүлэр бу туруорууну олус диэн сэҥээрдилэр. «Тэтим» үҥкүү ансаамбыла «Дьөһөгөй оҕото» үҥкүүнэн эҕэрдэлээтэ. Кыттааччыларга Индонезияттан сылдьар профессор Мустафа Рамли бэрт сэргэх лиэксийэни аахта. Кыттааччыларга үрдүк ситиһиини, чаҕылхай көрдөрүүнү уонна умнуллубат күннэри баҕарабыт!
Ааптар: Агеева Виктория, Бэрдьигэстээх улуустааҕы гимназиятын 11-с кылааһын үөрэнээччитэ, Горнай