Горнай улууһун В.Д. Лонгинов аатынан Атамай орто оскуолатын алын сүһүөҕүн алта эдэр чинчийээччитэ Бүтүн Арассыыйатааҕы «Юный исследователь» научнай фестиваль түмүктүүр түһүмэҕэр тиийэн дойдуларын аатын үрдүктүк аататтылар. Фестивальга дойду араас регионнарыттан 300 тахса кыттааччы кытынна.
Хас да түһүмэхтээх, перечневай «Юный исследователь» конференция бүтэһик түһүмэҕэр ыҥырыллан, чинчийэр үлэлэрин улахан учуонайдар иннилэригэр көмүскээннэр:
— Айсар Павлов, 4 кылаас үөрэнээччитэ «Социальные науки» секция 1 үктэллээх Лауреата буолла, ону тэҥэ конференция «Бастыҥ үлэтэ» муҥутуур үрдүк ааты ылан, көмүс мэтээлинэн, сыаналаах бирииһинэн наҕараадаланна. Бэйэтэ сөбүлүүр дьарыгын саха остуол оонньууларын, оҕо өй өттүнэн сатабылын үрдэтэр суолтатын экспердэр иннилэригэр эрэллээхтик дакаастаата. Салайааччылара Татьяна Павлова, Маргарита Степанова.
— Чаҕыл Федоров, 4 кылаас үөрэнээччитэ «Краеведение» секция 1 үктэллээх Лауреата буолары ситистэ. Саха сиригэр биир бастыҥынан биллэр, Федоровтар дьиэ кэргэн биэ үүтүттэн кымыс оҥорор сатабылларын көрдөрөн, утуму салгыыр ыччат буоларын кэпсээн, көрөөччүлэр үрдүк биһирэбиллэрин, махталларын ылла. Салайааччылара Диана Федорова, Маргарита Степанова.
— Динара Яковлева, 3 кылаас үөрэнээччитэ «Биология и медицина» секция 1 үктэллээх Лауреата. Баһаар кэннэ киртийбит үрэх уутун ыраастыыр аныгы тэрил үлэтин, нэһилиэнньэни ыраас уунан хааччыйыы үлэтин, ыраас уу доруобуйаҕа улахан туһалааҕын чинчийэн экспердэр дьүүллэригэр дириҥник арыйда. Салайааччыта Саргылаана Иванова.
— Слава Алексеев, 3 кылаас үөрэнээччитэ «Технические науки» секцияҕа 1 үктэллээх Лауреат үрдүк аатын ылла. Бэйэ илиитинэн оҥоһуллубут турник уратытын, бөҕөтүн, экономическай өттүнэн барыһын көрдөрөн сөхтөрдө. Салайааччы Саргылаана Иванова.
— Арылхан Аввакумов, 3 кылаас үөрэнээччитэ «Экология» секция 2 үктэллээх Лауреата. Арылхан Бүтүн Арассыыйаҕа аатырбыт «Атамай мүөтүн» оҥорор Филипповтар дьиэ кэргэттэрин ураты дьарыктарын, мүөт оҥоруу кистэлэҥин, туһатын туһунан кэпсээн дьүүллүүр сүбэ үрдүк хайҕабылын ылла. Салайааччы Саргылаана Иванова.
— Коля Яковлев, 4 кылаас үөрэнээччитэ»Биология» секция 2 үктэллээх Лауреата. Коля эрэллээх доҕорун, Хаарчаана диэн ытын ураты боруодатын, майгытын туһунан кэтээн көрбүтүн, чинчийбитин кэпсээн көрөөччү ураты тапталын, биһирэбилин ылла. Салайааччылара Анна Яковлева, Маргарита Степанова.
Фестиваль чэрчитинэн ыытыллыбыт Бүтүн Арассыыйатааҕы интеллектуальнай Олимпиадаҕа Айсар Павлов элбэх кыттааччыттан 3 миэстэҕэ таҕыста, үрдүк сыанаттан наҕараада тутта.
Хамаанданан күрэхтэргэ үөрэнээччилэрбит эмиэ үрдүк ситиһиилэннилэр. Ол курдук, «Волшебство науки» диэн тиэмэлээх бэйэни билиһиннэрии күрэҕэр: саха алмааһынан, дьүкээбилинэн, тыйыс тымныытынан наука айылҕаны кытары быһаччы сибээһин көрдөрөн, көрөөччү ураты болҕомтотун ылан муҥутуур кыайыылаах буоллулар.
Аны хамаандалар икки ардыларыгар ыытыллыбыт научнай квест оонньууга 3 миэстэ буолары ситистилэр. Ити курдук, уопсай хамаанданан зачетка Бэс Күөлүн оҕолоро 3 миэстэҕэ тахсан дойдуларыгар улахан ситиһиини аҕаллылар.
Учууталлара, төрөппүттэрэ, биир дойдулаахтара оҕолорбутунан киэн туттабыт. Дойдугутун ааттатар, улахан Патриот дьон буола улаатын диэн алгыыбыт.
Сиһилии:
Айтаана Павлова, Атамай оскуолатын 10 кылааһын үөрэнээччитэ