Ийэ тыл, сурук-бичик күнүгэр «Үтүө куттаах айар бэлэх» диэн литературнай көрсүһүү буолла. Бу тэрээһини олохтоох бибилэтиэкэр Ольга Нинеловна Сафонова уонна оскуолабыт бибилэтиэкэрэ Лариса Степановна Горохова иилээн саҕалаан ыыттылар. Дириэктэрбит Валентина Герасимовна Павлова, саха тылын уонна литературатын учуутала Петр Николаевич Слепцов бу үөрүүлээх күнүнэн эҕэрдэлээтилэр.
Оскуолабыт 80 сыллааҕы үбүлүөйүгэр анаан 2012 сыллаахха бэчээттэнэн тахсыбыт «Үтүө куттаах айар бэлэх» диэн кинигэ тула кэпсэтии оҕолор интириэстэрин тарта. Бу кинигэ хоһоон хомуурунньуга буолар. Биһиги учууталларбыт, оскуола үлэһиттэрин, үөрэнээччилэрин хоһооноро түмүллүбүт олус үчүгэй ис хоһоонноох. Билигин биһиги бөһүөлэкпитигэр суох ааптардар куйаар ситимин нөҥүө эҕэрдэлин эттилэр, бу хомуурунньукка киирбит хоһооннорун аахтылар.
Сынньалаҥҥа олорор учууталбыт Гуляева Светлана Прокопьевна, «Олоҥхо» тыйаатырын артыыһа Колесов Павел Афанасьевич, улуустааҕы культура салалтатын методиһа, алгысчыт Колесов Василий Афанасьевич, Дьокуускай куоракка үлэлиир «Куолас» ырыа оҕо студиятын салайааччыта Саввинов Христофор Эдуардович, Дьокуускай куораттан элбэх оҕолоох ийэ Федорова Яна Прокопьевна (нуучча тылын учууталынан үлэлээбитэ), Верхоянскай куорат физкультуратын учуутала Потапов Олимпий Андреевич кинигэҕэ бааллар. Бу хомуурунньукка киирбит хоһооннортон хас да хоһоон ырыа буолбутун биллибит. Ол курдук саха эстрадатын биллэр ырыаһыта Лэгэнтэй муусукатыгар, Ый Кыыһа толорор ырыата — биһиги оскуолабыт алын кылааһын учуутала Анна Еремеевна Ефимова «Ийэм миэхэ эппитэ» хоһоонунан айыллыбыт эбит. Айталина Ильинична Бурнашева ийэтигэр анаабыт «Ийэм бэлэҕэ» хоһоонун бэйэтэ муусукалаан ыллаан иһитиннэрдэ. Мин эһэм, Гаврил Гаврильевич Старостин хоһоонугар олохтоох мелодист Олег Домнин муусукатын айан Арыылаахпыт гимна буолан ылланар. Хомуурунньук ойуутун Оля Ефимова 9-с кылааска үөрэнэ сылдьан ойуулаабыт.
Айар куттаах дьоннорбут, учууталларбыт бэйэлэринэн холобур буолан оҕолору кытта тэҥҥэ үлэлэһэн элбэҕи ситиһэллэр, биһигини элбэххэ үөрэтэллэр. Көрсүһүү интэриэһинэйдик ааста, элбэҕи биллибит. Төрөөбүт тылын өрө тутар омук кэскилэ тэнийэр, өлбөт уһун үйэлэнэр.
Илларион Старостин,
X кылаас,
«Аартык» эдкора,
Арыылаах, Дьааҥы.
Дайаана, Ангелина Потаповалар хаартыскаҕа түһэриилэрэ.