Биһиги оскуолабытыгар умнуллубат, ураты, үөрүүлээх күн буолан ааста. Ол курдук, «Куорсун» диэн ааттаах хаһыаппыт бастакы нүөмэрин Ийэлэр күннэригэр анаан оҥордубут.
Бырааһынньыкка анаан хаһыаппыт эҕэрдэ аккырыыккалаах, элбэх оҕо ийэлэригэр анаан суруйбут хоһоонноро, ийэлэрин бар дьоҥҥо сырдатыылара, айар куттаах учууталлар ырыа буолбут хоһоонноро, сынньалаҥҥа таайбараҥнар, араас сүбэлэр киирдилэр. Бэлэх хаһыаппытын уонна эҕэрдэ аккырыыккабытын тутан баран дьон-сэргэ санаатын үллэһиннэ.
Саввинова Вилюяна Николаевна, 4 оҕо ийэтэ, математика учуутала:
Олус үчүгэй, интэриэһинэй ис хоһоонноох «Куорсун» хаһыат уонна аккырыыкка туттум! Махтал салайааччыга уонна оҕолорго!
Дария Николаевна Юмшанова, пенсионерка: Миэхэ эҕэрдэ аккырыыккалаах, «Куорсун» хаһыаттаах эҕэрдэлээбиттэригэр соһуйдум. Соням ийэтин туһунан хоһоонун ааҕан уйадыйдым. Дуняшабыт орто дойдуттан барбыта 11 сыл буолла да өрүү саныыбыт. Онтон Сонябыт үөрэхтэнэн үлэ-хамнас буола сылдьар.
Анна Петровна Аммосова, 5 оҕо ийэтэ, балыыһа үлэһитэ: Биһиэхэ эмиэ сырыттылар, улахан махтал. Айар үлэлэригэр үрдүктэн-үрдүк ситиһиилэри!
Полина Гаврильевна Домнина, элбэх оҕо ийэтэ уонна эбэтэ, сынньалаҥ киин уус-уран салайааччыта: Оскуола эдэр корреспонденнара ийэ күнүнэн бэйэлэрин хаһыаттарын, ыстатыйаларын тиһэн сэргэх сонуннаах бэлэх ууннулар. Махтанабыт,өссө да айар дьоҕурдара сайдан истин!
Ульяна Николаевна Гуляева, 3 оҕо ийэтэ, элбэх сиэн эбээтэ, уһуйаан үлэһитэ: Истиҥ ис хоһоонноох хаһыаты бэлэх ууммуттарыгар барҕа махтал! Кыыһым Уйгу хоһоонун ааҕан бараммын долгуйдум.
Валентина Герасимовна Павлова, оскуола дириэктэрэ: «Куорсун» хаһыат корреспонденнарыгар, салайааччы Розалия Степановнаҕа махтал!! Хаһыат матырыйаала элбэх, интэриэһинэй, туһалаах рубрикалардаах, эҕэрдэ аккрыыккалаах! Хаһыат ситимин быспакка тахса турарыгар баҕарабын!
Бу курдук бииртэн-биир махтал тыллардаах суруктары тутан үөрдүбүт, салгыы үлэлииргэ кынаттанныбыт!
Илларион Старостин, XI кылаас,
Арыылаах орто оскуолата, Дьааҥы.