Арыы Толоон оскуолатыгар Саха Өрөспүүбүлүкэтин иккис президенэ В.А. Штыров, 2005 сыл бэс ыйын 11 күнүнээҕи ыйааҕынан Саха Өрөспүүбүлүкэтин уонна Арассыйа Федерациятын култууратын үтүөлээх үлэһитэ, саха маҥнайгы дьахтар суруйааччыта Анастасия Саввична Сыромятникова аата иҥэриллибитэ.
Биһиги оскуолабыт 1969 сыллаахха алын сүһүөхтээх оскуола быһыытынан арыллыбыта. 1999-2000 сылларга 8 кылаастаах ситэтэ суох оскуола буолбута. Онтон 2001 сылтан 9 кылаастаах сүрүн оскуола буолан үлэлии хамныы турар.
Биһиги оскуолабыт төһө да кыра буоллар кыайыыларбыт, ситиһиилэрбит үгүс. Ол курдук, быйыл Арассыыйатааҕы, өрөспүүбүлүкэтээҕи, региональнай, оройуон таһымнаах араас олимпиадаларга, научнай-практическай конференцияларга, конкурстарга, спортивнай күрэхтэһиилэргэ үрдүк ситиһиилэри көрдөрдүлэр.
Ордук биһигини үөрдэр, алын сүһүөх үөрэнээччилэрин ситиһиилэрэ. Ол курдук: саҥа билии аанын сэгэтэн үөрэнэ сылдьар оҕолорбут Степанова Ася, Тимофеева Аня, Атакова Соня республиканскай олимпиадаларга 1,2,3 миэстэлэри ылбыттара. Бу быйылгы үөрэх дьылыгар саҥа кэлбит алын кылаас учууталын үөрэнээччилэрин Дедюкина Анастасия Павловна үрдүк көрдөрүүлэрэ буолла. Сафонова Ирина Власьевна үөрэнээччитэ Слепцов Алеша региональнай, республиканскай олимпиадаларга 1, 2 миэстэлэриылбыта. Канашова Мария Васильевна 3 кылааһын оҕолоро Степанов Егор, Аммосов Максим, Спиридонова Камила, Саввинов Айтал, Ноева Настя региональнай,республиканскай, всероссийскай олимпиадаларга, күрэхтэргэ ситиһиилээхтик кыттан, үгүстэригэр 1,2, 3 миэстэлэргэ тиксибиттэрэ. Степанов Эрсан, Баланова Олеся региональнай, республиканскай олимпиадаларга 1,2,3 миэстэлэри ылан, алын сүһүөх түмүктүүр сылларыгар, учууталлара, Степанова Екатерина Прокопьевна биэрбит билиитин ситиһиилээхтик көмүскээбиттэрэ.
Биһиги оскуолабыт сылын аайы алын кылаас үөрэнээчилэрин ортолоругар инсценировка күрэҕин ыытар уонна былырыҥҥы үөрэх дьылыттан читательскай грамотность олимпиадатын тэрийэн саҥа сүүрээн киллэрбиттэрэ, биһиги учууталларбыт таһаарыылаах үлэлэрин биир көрдөбүлэ буолар дии саныыбыт.
Улахан да кылаастар үөрэнээччилэрэ ситиһиилэрэ үгүс. “Алдан-Ситим” холбоһук ыытар региональнай олимпиадаларыгар куруутун миэстэлэһэллэр. Быйылгы да үөрэх сыла хаалсыбат. Холобур, Степанова Айгылаана английскай тыл олимпиадатыгар 1 миэстэни ылбыта, саха тылыгар республиканскай олимпиада муниципальнай этабыгар Степанов Эрчим 2, Аммосова Сардаана 3 миэстэ буолбуттара. Чинчийэр үлэлэри көмүскүүр НПКаларга кыттан бириистээх миэстэлэргэ тиксибиттэрэ.
Арыы-Толоон былыр былыргаттан спорду өрө тутар, эт-хаан эрчийиитин сыаналыыр нэһилиэк буолар. Төһө да усулуобуйа кыратын иһин физкультура учууталларын көҕүлээһининэн оҕолорбут спорт араас көрүҥүнэн дьарыктаналлар. Быйыл оскуолабыт үөрэнээччилэрэ спорт өттүгэр ситиһиилэрэ эмиэ үгүс. Ол курдук, оройуон оскуолаларын оҕолорун спартакиадаларыгарволейболга уолаттар хамаандалара 2 миэстэ, шашкаҕа, шахматка Тимофеева Анжелина, Костромыкин Ариан 2 миэстэ буолбуттара. Тимофеева Анжелина шахмат сборнайын састаабыгар киирсэн куоракка баран республикаҕа оройуон чиэһин ситиһиилээхтик көмүскээн кэлбитэ биһигини олус үөрдүбүтэ.
Быйылгы үөрэх дьылын түмүгүнэн оскуола оҕолоро араас тэрээһиннэргэ 100 кыттыыны ыллылар, онтон 90 1,2,3 миэстэлэргэ тигистилэр. Оскуолабыт иһинэн араас тэрээһиннэр, спортивнай күрэхтэр, предметнай неделялар ыытыллаллар. Онно төрөппүттэрбит куруук өйүүллэр, кытталлар, ыкса ситимнээхтик үлэлэһэллэр. Быйылгы үөрэх дьылыгар биһиги оскуолабыт тэриллибитэ 55 сыллаах үбүлүөйэ, онтон аны саас Анастасия Саввична 105 сааһын бэлиэтиир үөрүүлээх сылбыт.
Онон кэлэр үөрэх дьылыгар, оҕолорбут өрүү бу курдук ситиһиилэринэн дьоннорун, оскуолаларын өссө да үөрдэ, ааттата туруохтара диэн эрэнэбит.
Саргылаана Аммосова, дириэктэри үөрэх өттүгэр солбуйааччы,
Арыы-Толоон сүрүн оскуолата, Томпо